OSHAKATI – Aakalimo molukanda Evuluuko moshitopolwa shaShana oya holola enyanyu sho ya yambindhindhwa niikulya, kelelo lyondoolopa lyaShakati oshowo kombelewa onene yoshitopolwa.
Aakalimo yeli 66 yomEvululuko. Mbaka oya pewa kehe gumwe oshako yo10kg yuusila, ekende lyomagadhi 750ml oshowo okapakete koohi dhomaspangela.
Claudia Indongo omukalimo gomEvululuko okwa hokolola kutya ka kwali e na omweelelo esiku ndyoka ye ishewe okwali owala e na mo uusila uushona megumbo.
“Sho ha kuti Kalunga iha dhipagelwa oyana, osho shili. Nena ongame nguka nda yambekwa. Ngame omunelago oshoka onda tothwa mo mokati kaamboka yataalela onkalo ondhigu,’’ ta pandula ngaaka.
Petrus Timoteus ngoka naye esiku ndyoka a pewa iikulya okwa ti, okwa pandula sho ayambindhindhwa ngaaka.
“Kandina iiyemo ya sha nonando ha ndi nyangadhala ngaa mpeya naampeyaka,” ta popi ngaaka.
Timoteus okwa tsu wo omukumo yakwawo ya taalela onkalo ngaashi ye, ta ti, itaya puko esiku limwe moshikando sha landula nayo otaya ka pewa.
“Otwa yambindhindha aakalimo mboka twa ndhindhilike kutya oya pumbwa omakwatho unene, yaana iiyemo ya sha,” aanambelewa ya ti ngaaka.
Oombelewa oonene dhoshitopolwa shaShana neyambindhindho lyombelewa yomupilimaminista omumvo gwa ziko odha gandja iikulya komalelo goondoolopa Oshakati, Ondangwa nOngwediva opo yi ka topolelwe aakalimo yomoondoolopa mboka ye li mompumbwe.
Iikulya yoshikukuta oya gandjwa komalelo goondoolopa gatatu moshitopolwa shaShana, sho kwa li kwa ndhindhilikwa kutya ope na aakalimo yamwe ya taalela onkalo ondhigu omolwakwaa na iilonga, nenge ihaaya nyangadhala.
Omalelo agehe kumwe oga pewa iikulya yongushu yoshimaliwa shoN$134,375.00.
Iikulya mbyoka ya gandjwa, uukutu wuusila wu li 184, omakende gomagadhi gokulya ge li 184 oshowo oondooha dhoohi dhi li 737.
Kansela gwoshikandjohogololo shaNgwediva ngoka e li wo omunashipundi melelo lyoshitopolwa shaShana Andreas Uutoni okwa li a kumagidha omalelo goondoolopa ngoka ga ka topole iikulya mbyoka, ihe inage yi pungula.
“Iikulya mbyoka nayi gandjwe kaakalimo mboka ye li lela mompumbwe, ihe inayi topolelwa kwa taliwa kookuume nokaakwanezimo,” ta kumagidha ngaaka.