KATIMA MULILO – Sikiliti sa Zambezi sitezi buikuhumuso ni nyakalalo naha hai amuhela mueteleli wapili wamusali, Netumbo Nandi-Ndaitwah. Mwa Zambezi, kitaba yetuna mi haki tulo feela ya lipolitiki, kono isupeza tundamo ni kuhulisa basali mwa Namibia. Kukala ka baeteleli ba sikiliti, balipisinisinyana ni babakungulezwi kwa tuko kaufela bafitisize manzwi abuitumelo.

Mwa manzwi ahae kansela wa silalanda sa Katima Mulilo ya Tolopo Kennedy Simasiku naize kitulo yetuna ni sisupo sa kuli ndwa ya tukuluho nengelezi cwalo ni kunanula basali. “Swapo kutahisa taba yeo kasamulaho alilimo ze 35 za tukuluho ki taba yende. Kusupeza kuli ndwa ya tukuluho ki ya mañi ni mañi,” nabulezi.

Naekelize kuli naha Namibia ibonisize mokuñata kakufa basali litulo zecwale ba atuli, bazamaisi ni ngambela wanaha. “Kuketa mueteli wanaha wamusali neli ku ezeleza ni kunyatela kuli basali kamaniti bakwanisa, mi basupelize kuli bakona kuba baeteli sakata mwanaha yaluna,” na ekelize. Nabulezi hape kuli una ni sepo ya kuli Nandi-Ndaitwah uka zamaisa hande naha, sina hakalile kale kubeleka mwa mubuso mi kopano ya Swapo ni buitamo bwa lisepiso kwa sicaba ikaba misumo ya hae.

Muzamaisi sapili wa munzi wa Bukalo Martin Limbo nalumbile kamaiso ya mueteleli yomunca sihulu kufukuza makolo amubuso. “Kitabo ni nyakalalo sihulu hala keto ya Nandi-Ndaitwah. Kubulela feela buniti nenisa musepi, kono cwale nakolwa kamaiso yahae kakuya mwana kalezi,” nekubulezi Limbo. Nasupile sihulu keto ya Elijah Ngurare kuba ngambela, kabuba keto ya butali yekatisa musebezi omunde mwa mubuso.

Tabo yeswana nebonisizwe kimuuna walipisinisi zakuipeleka mwa Katima Mulilo Dobson Kwala, yana ize keto ya mueteli ki sisupo ni pizo kwa likalibe kuli bange taba ya bueteleli kuba ya butokwa. Naize sizo kamita nesitahisa kuli basali basike bakambama mwa litulo, kono una ni sepo yakuli kupahama kwa Nandi-Ndaitwah kuka cinca mihupulo yecwalo.

Kuyemela sicaba sa Makwengo mwa Bwabwata, Khumalo Kaseta nafitisize manzwi akulakaleza hande Nandi-Ndaitwah, nikulemuha ketelelo ya hae kakuba petuho kwa sicaba se si kungelezwi kwa tuko mwanaha Namibia. “Lutezi buitumelo ka swalisano ya hao yakulwanela bayahi kaufela banaha Namibia, sihulu bao kwamulaho neba kungulezwi kwa tuko,” nabulezi. Naize una ni sepo kuli mueteleli uka kwala masuba ni mitano ye kauhanya sicaba, ni kuhulisa lingambolo ze yahisa ni kutahisa zwelopili kwa sicaba kaufela.