Kavetja Ngaizuvare

!Gangu !nâ ra ǁamaxū ǂharugu-aon ge ǂhâǂhâsa !âsa tsēkorobe kai!ā ûib !nâ ra ǀhuru, ǁîn ra supuse tsî ǀgūse sī!nâhe ǁkhā ǂganǀgaugu ai ǂkhari ǀnūb ǂûna ǁamaxū amaga. 

Nausan nēti ī ǂhâǂhâsa !âsa ra ǀhuru, xawen ge ǀgaisa tsēkorobe ǁgoaǂuidi ǀkha ǂnôa, ǀgaisase tsî !garisen ûis !aroma ra sîsen amaga. 

ǂOa ge wekheb !nâb ge New Era ǀnîkhamikō ǁamaxū-aon ǀkha gere ǁgamǁare, ǁgoaǂuidi ân xa !nāsase ǂansa hōs ase. 

Peter  Hamateb, Katuturas di ǁanǂgāsabeb, 19 kurixa ǂkhamkhoeb ge sao rana gere mî “ Tita ge ti mamasa 12 kurixa ta a hîa ǁōb ǀkha ge ǂoa!nâ, ti dadaba ta ge tātsē ǀhao-ū tama hâ. 

Tita ge ǁnā kurin ǀkha ǀnai !garise ge sîsentsoatsoa, î ta ti ǂkham !gâsaros âtasa kō!gâ,” tib ge ge mî. 

Hamateb ge tsēkorobe ǁgoa!aromas di 4 ir ra khâima tsî selfongu kredit-i tsî tamadena ra ǁamaxū. 

!Gâi ka tsēdi aib ge N$400 ra kuru tsî ǂkhawusa tsēdī ai N$100 tsēsa ra kuru. 

Nau ǀkhāb aib ge 25 kurixa Claude Dieudonne Clovisi hîa a Democratic Republic Congob (DRC) dib ge ani !upuna ra ǁamaxū. ǁÎb ge !gâi ûiba mûǂuibasens ǀkha Namibiaba !oa ge hā. 

Tsēs âb ge 06H00 tsî 07H00 ǁaegu ra ǂnāǁnâ. ǁÎb ge N$600 ai !upuna ǁ-ama tsî ra ǁamaxū. !Gâi ka tsēdi aib ge N$400 tsēs ai ra kuru, !nona tsēde ǁamaxūtoasa ra ū !upun ǀkha. Clovisi ge ǁkhâba ra ǂhā îb ǀorodomma N$2000 ǁkhâba hōǂgāse, mamas âb tsî !gâsan âbab DRCb ǁga marisa nî sîbase. 

Maria Kangogoros ge a 36 kurixa tsîs ge kapana-i tsî vetkukidi tsîna Katuturas di Black Chaini tawa ra ǁamaxū. 

Marias tsēs ge ǁgoa!aromas di 03H20 ai aiǂhomisens ǂûn dis ǀkha ra tsoatsoa. ǁÎs ge !nona ǀgôan di ǂûs tsî saran !aroma !garise ra sîsen. 

Tsēs hoasas ge ǁaupexa N$40 ra kuru xawes ge !gâi ka tsēdi tsî ǁkhâbǀunidi ai N$2 000 kōse hōǂgā ǁkhā. 

ǀAeǁgams !Ā!khōmais mîgowaba-aob, Harold Akwenyeb ge ge mî, ǂoa ge kurib di Taraǁkhumuǁkhâb ain ge xoamâisa ǂkhariǀnōb ǂharugu-aona ǀAeǁgams !nâ 890 ai mâ isa.