ONGWEDIVA – ǀHaob ain ge 1 562 khoena malarias ǀaegu ǀkha !gaeǁaresa ūhâse Ohangwenab, Oshanab, Omusatib tsî Oshikoto ǀkharigu !nâ ǀae-omdi !nâ ge ūǂgāhe, ǁnāpan 27 khoena ûiga nē ǁōs xa !aromahe hâse ge ǂoa!nâ hîa. New Erab ǀkhab ge ūhâ i ǁgamǁare-i !nâb ge Engela ǂHanusi ǀAeǁgâub di Senior ǀAe!khōs Mâisab, Dr Lukas Nghaamwaba ge mî, Ohangwena ǀkharib nē ǀkharigu ǁaegu ǁîb a ǀgapi !gôab di malaria !nae!khaide ge !nurihesa, khoese ǁōgu ǀkha ǀhao hâse. Ohangwenab ge 5 808 malarias !nae!khaide ge !nurihe, ǁîsa xub 1 767 !gôaba a ǀkharisi tsî 3 041 khoena !augaba xu hāǂgâxahâse. Oshana kharib ge 335 !nae!khaidi tsî ǁkhaisa ǁōga ūhâse a !nurisa. Omusati ǀkharib !nās aib ge ǂUrusib Direkteri, Dr Alfons Amoomoba ge mî, nē kurib !aroman 346 malarias !nae!khaidi tsî ǀgui ǁōb tsîna !nuri hâsa. “ǀGūǁae māǂuisa !nurigu !oagub ge Outapis tsî ǂnamipeba hoan xa ǀgaisase a tsâǀkhāsa 320 !nae!khaidi ǀkha,” tib ge Dr Amoomoba ge mî. Nē !gôaba ra ǀgapi kais ge Mahenenes tsî Omakuwa !garo!āra hîa Angolab !hūǀgoras tawa ǁgoe ra  ǀgapi !gôagu malarias digu ǀkha a !nurisas xa ra !aromahe. !Nāsa !nae!khaide ge Angolaba xu hâ. Amoomob ge ge mî, ǁîn ge dā!harodi ǀkha a tsoatsoa nē mâsiba oresa hōbas !aroma tsî malarias mûǂams !khaikha Omakuwas tsî Mahenenes hâra tawa a ǀhui-amsa. “Sida ge kai !gôagu !nâ malarias !âide dī, ǀhûhâsiga ǁkhāǁkhākhâide skolgu tawa malarias ǂnamipe mā tsî ǂhôaǂgares !nā-ūs tsîna ra hōhō!nâ,” tib ge ge mî. Nēnab ra dī, xaweb ge ǀkhariba ǀûitsina ǁkhaes netgu di ǀorosib ǀkha ǂnôa. Oshikotob di ǂUrusib Direkteri, Joshua Nghipangelwab ge ge mî, ǁîn 1080 !nae!khaidi tsî khoese ǁōgu tsîna !nuri hâsa. “Sida ge ǀgaisa ǂharos malarias diga ge !hara, !gōsase Tsumeb tsî Omuthiyas !â!â kha !nâ. Nēsis kōse i ge kaise a ǀoro !gôab ǀguiba Onandjokwe ǀkharisi !âb !nâ a !nurisa,” tib ge Nghipangelwaba ge mî. ǁÎb ge ǀhûhâsiga ra ǂgaoǂgao!nâ, nē ǁ-aeb malarias a !hauxab !nân !hae -ǁaegu !nâ ǂurusib huiba ǁîn ǀgūse mâ klinikdi tamas ka i o ǀhûhâsib ǂurusib sîsenaon ǁîn !garo!ādi !nâ hân tawa nî ôasa.