Opolifi yaNamibia oya ti okudja mefiku 01 fiyo 28 Februali 2026 oya kwata ovanhu ve li 200, noku va tula konima yokakuma mekwatafano lomapangwe.
Omapangwe aa a kwatwa novafekelwa ongaashi o 391,879kg cannabis, 28,363 mandrax, 47.7 cocaine neepela dokukufa mo omapunda di li 50. Omupopiliko wopolifi moNamibia Deputy Commissioner Kauna Shikwambi okwa ti elongifo loingangamwifi onghee ngaho tali ende tali kulu moshilongo, ashike ovapolifi ove lipaka mo mokupatolola osho yo okuhada eendongelwa dovaenda nandjila nokutula ava tava nyono oveta moipandeko. Mwaava va tulwa kopolifi moipandeko omwa kwatelwa Ovanamibia veli 187, Ovaangola vaheyali, Omuzimbabwe umwe osho yo Omutanzania umwe.
Manga elongifo lomapangwe li li la hanya nole lihanena oshilongo ashishe, dimwe domeefikola ngaashi konooli ode lipyakidila nokuninga omihandjo dopaumwene, opo di dule okukwafa ovanafikola vahapu ava vaninga oihakwana yomapangwe momalukanda. Umwe womakulunhufikola womeefikola di li keengaba daShikango naAngola, Shakwenonghwe Filipus okwa ti ovanafikola vavo vahapu ova ninga oihakanwa yomapangwe unene okudilila moAngola.
“Ohashi kala sha nyika oshiponga neenghono shaashi vahapu ohava kanifa okondolola, momaumbo ihava kala mo vali, vo ngeenge ovanu omapangwe onghee ngaho tava twikile noimbuluma ya yooloka,” ta ti.
Omupangi umwe ha longo moshipangelo shaNgela oo a pulwa aha tumbulwe kedina okwa ti luhapu ohava yakula ovanyasha unene ovalumenhu ve na omauluvi adja peenhele molwelongifo lomapangwe.
“Ounona ava ova pumbwa okukala ve li meefikola shaashi ovo oshiwana shokomungula, ndele ova teka po ashike kelongifo lomapangwe,” ta ti.
Shikwambi okwa ti mexuliloshivike opolifi oya lopota ovanhu ve li vatatu, mekwatafano loiningwanima itatu i na sha nomapangwe.
“Umwe womuvo nokuli kodolongo yaRundu okwa li ta kendabala oku vakela omapangwe meesela, eshi ali e ya okutalela po omunadolongo,” Shikwambi ta ti.
Ovakwashiwana ava aveshe ova tulwa moipandeko, nomakonakono opolifi otaa twikile.
-taimihaihambo2000@gmail.com