WINDHOEK
Ongundu yoSwapo metiyali oya tseyitha kutya otayi ka tameka niikonga yawo yomahogololo omwedhi nguka miikandjohogololo ayihe sho ongundu tayi ilongekidhile omahogololo gopaupresidende niilyo yomutumba gwopashigwana ngoka ga thanekwa ga ka kale ko omumvo tagu ya, 2009.
Metiyali amushanga gwomauyelele nepashulo lyoshigwana, Jerry Ekandjo, okwa tseyithile iikundaneki kutya momasiku 19 Apilili, sho ongundu tayi ka tyapula omimvo 48 dhetotepo lyongungu, otayi ka tameka wo niikonga yayo ya yaga kegonga miikandjohogololo 107, niikonga mbika otayi ka kala nokuningwa sigo omomumvo 2009 sho taku ka ningwa omahogololo gopashigwana. Shika otashi ka ningwa molwaashoka ongundu oyi na ehalo okuyangata po iipundi ayihe 71 mOmutumba gwOpashigwana – ano moparliamende. “Elalakano okuyuga ko iipundi 71 nokuthigila po Hidipo Hamutenya oshipundi shimwe,” Ekandjo ta ti. Pauyelele waEkandjo, aaunganeki yopaitopolwa yOngundu yoSwapo otaya ka tameka nomailongekidho ge nasha nomatyapulo goomvula 48 dhoSwapo ngoka taga ka ningwa eti 19 Apilili. Aaunganeki yoSwapo yopaitopolwa otaya indilwa ya longekidhe omatyapulo ngaka. Oombelewa oonene dhongundu otadhi ka gandja aapopi ya simana mesiku ndyoka. Omasiku 19 Apilili 2008 oge na okudhimbulukiwa nokusimanekwa moshitopolwa kehe moNamibia,” Ekandjo ta ti. Oombelewa dhOngundu yoSwapo dhopaitopolwa otadhi vulu wo okulongekidha oshigongi shimwe oshinene oshowo iiningwanima yokudhimbulukwa esiku ndyoka pomahala gayooloka moshitopolwa ngele oye wete sha pumbiwa,” Ekandjo ta ti.
“Ewawa lyAakokele moSwapo, Ewawa lyOomeme, lyAagundjuka oshowo Ondundahangano yomahangano gaaniilonga moNamibia (NUNW – National Union of Namibian Workers) pamwe nomahangano galwe gaaniilonga ngoka ga yama kondundahangano ndjika oshowo oondondo adhihe dhOngundu yoSwapo otaya indilwa opo ya kuthe ombinga shi wetike mokulongekidha iiningwanima yesiku opo ku ka sikumuthwe omuyalu ogundji gwiilyo yongundu miitopolwa,” amushanga gwomauyelele gwongundu tayi pangele ta ti. Swapo okwa tegelela oku ka likola esindano enene momahogololo gwomumvo 2009.
Oshiwike sha zi ko, ongundu ndjika oya sindanene omahogololo ga gwedhwa po moshikandjohogololo Eenhana, shoka Ekandjo ta ti oshi li ekoleko kutya onyeka yemanguluko oya yeluthwa natango pombanda. Ongundu yoSwapo momahogololo ngoka oya yangata po omawi 4193 gwomomawi gaahogololi 4 494, omanga ongundu ompe Rally for Democracy and Progress – RDP ya mona mo omawi 289 noCongress of Democrats – CoD ya likola omawi 12.
Ekandjo ota ti ongundu ye natango otayi ka mona omawi ogendji momahogololo gelelo epe lyondoolopa Omuthiya ngoka ga shunithilwe monima omathimbo ga zi ko. Ekandjo ota gandja ombedhi koongundu dhoka dha totwa konima yemanguluko kutya odha totwa po ashike molwoondjahi nomaiyuvonayi gaantu yontumba koohandimwe. “Pethimbo lyookongressa dhakwalukehe, aantu mbaka inaye shi pondola okumona oonkatu dhoka kwali taya lalakanene,” Ekandjo ta yelitha. Omanga ta hololola oluhodhi lwe omolwomaso gomapendafule gaNamibia ngoka ga manene oondjenda omathimbo ngaka, Nico Bessenger, Julia Nepembe naJohn Pandeni, Ekandjo ota ti iilonga yawo kaya li osima yowala mekondjelomanguluko lyoshilongo.