Victoria Kaapanda
EKAMBA- “Inatu kanitheni omuthigululwakalo gwetu,”ndhoka odha popiwa Komupeviminista mOmbelwa yOminista Onkuluntu Chief Samuel Ankama sho a li a londodha aakwashigwana okupitila maatolinkundaneke mehuliloshiwike lya zi ko.
Ankama okwa li a longekidha olweendo lwowina sho a li a gongaleke aatoli nkundana yomoNooli, noku ya ulikila kutya omuthigululwakalo oko gu li natango ogwa pumbwa ashike okusimanekwa nokutaandelithwa.
Aatolinkundana ya za kiikundaneki ya yooloka oya li ya ulikilwa egumbo limwe ndyoka lya dhiginina omuthigululwakalo sizo onena.
Egumbo ndyoka oli li mOshitopolwa shaShana mOmukunda Ekamba, lyaAbraham Eliaser ngoka a li a fatulula paufipi esimano lyomuthigulwakalo oshowo nkene omuthigululwakalo gu na okukwatelelwapo nokuhumithwa komeho.
Eliazer okwa li a enditha aatoolinkundana megumbo lye alihe, ta fatulula omahala agehe nesimaneko lye gumbo lye.
“Oshoto olyo ehala ndyoka hali thikilwa kaalumentu ngele taye ya megumbo lyandje, ashike ngele taye ya iha ya thikile ashike kehe kombinga yoshoto ndjoka ya hala oku kuutumba ihe ohaya thikile ashike kolumoho omanga ngame te thikile kokulyo lwoshoto sho tandi ya ndi ya popithe hoka ku na omutumba gwandje. Eliaser ta ti ngaaka.
Ta gwedha po ta ti ngele okwe ku adha kokulyo lwoshoto nena owa taaguluka ompango na ke wete tamu ka uvathana we.
Okwa li wo a ulike kehala ndyoka lya taalelathana nondjugo ye mpoka opo hapu zilile oyana ngele taya fukala, uuna te ya thindikile ya pitemo megumbo.
Ta fatulula kutya megumbo lye sigo onena aalumentu ihaya ende kelugo, ngele oya hala ko sha, otaya pula aamwayinakadhona ye shi ete.
Mbyoka oyo kwa li iishona a totha mo esiku ndyoka, ta ti omuthigululwakalo megumbo kapu na siku gu dhimbiwe ashike okwa hala kehe gumwe e shi taambe ko nokushitaandaleka ngaashi ye te shi ningi ngaaka.
Ankama okwa li a fatula omalovu giilya ngoka haga dhungwa noku nuwa unene ashike piituthi yontumba, okwa li a hokola nkene haga dhungwa ta ti aanyasha yopayife aashona ye shi okudhunga omalovu giilya.
“Omuthigululwakalo oshinima sha simana noonkondo, nosha pumbwa okukalekwa po opo wo mboka taya ka valwa konakuyiwa ya tseye ooyinakulululwa sho kwa li haya ningi” Ankama ta ti ngaaka.
Okwa li a fala osheendo sigo okehala limwe lyi li natango momukunda Ekamba hoka ku na onzimbogo. Onzimbogo ehala ndyoka hali folomonenwa omatiti, omaluho na kehe shoka hashi folomwa momalowa.
Oohandimwe yaalongwantu dhingi oha ya etha nokudhina omithigululwakalo dhawo nokukala yi ikongela dhimwepo nokomukalo ngoka ohaya kala ya fa andola aakwiilongo.
Oshigwana osha li sha londodhwa kutya inashi kanitha omuthigululwakalo gwetu molwa andola elongo. Elongo nali mangele kumwe nomuthigululwakalo.