WINDHOEK-Omweetipo gwomikwelengendjo kaahikingalo ya yoolokathana, Bosley Keya ngoka a tseyika nawa nedhina Dj K Boz okwa ti ye ota ka pititha oshindji ngele tashi ya mehangano lyoongalo.
K Boz okwa lombwele oshifokundaneki shika oshiwike shika kutya nuumvo otapu ka tya pwaka, ye ishewe ota ka gandja omainyanyudho ga kwata miiti ngele tashi ya piituthi ya yoolokathana moshilongo.
Kakele kwaashoka, K Boz ota ka pititha oalbuma ye ontintatu moka ta ka longa naahikingalo oyendji moshilongo, nelalakano lyoku ulika nokugandja uunongo kaahikingalo mboka aashona. Moalbuma ndjika omo moka K Boz ha kongo aluhe aahikingalo yomoshilongo mboka taya imbi ongowela, ye e te yaningile omikwelendjendjo ndhoka dha dhenga mbanda.
K Boz okwa tseyika nawa noku eta po ooalbuma ndhoka dhandhenga mbanda dhomuhikingalo Sally Boss Madam. Pehulilo lyomvula ya za ko okwa li apitiha oalbuma ye ontiyali yedhina 38, ndjoka kwa li ya tseyithwa kehala lyoGoethe Institute.
K Boz moalbuma muka okwa li a longa pamwe naahikingalo ngaashi Slickartie, Skrypt, Ethnix Namibia, Fiston, Don Kamati, KP Illest, Sally Boss Madam nongundu yoBlvckBoxx Entertainment Family. Ongalo ye ndjoka ya li ya dhenge mbanda oyo ndjoka yedhina Maukuhongo, a li ta kwathelwa kuEtjo okuza mongundu yoEthnix.
K Boz okwa ti kakele ashike oku ka imba pamwe naahikingalo aashona nuumvo moalbuma ye, ota ka longa pamwe naKing Teedee, Gazza, Exit naMushe, oku eta po oongalo ndhoka tadhi ka humitha ehangano lyoongalo pamuthika gwopombanda. “Onda hala oku longa konyala naahikingalo ayehe moshilongo, nomusholondondo ita gu hulu nande,” K Boz ta popi ngaaka.
Dj K Boz ngoka e li e na ehangano lye yemwene lyoongalo lyedhina Turntable King, okwa ti oye a ningila okangalo kaThe Dogg kotango omikwelengendjo kdhina Onayena No 9, noye omuhikingalo gwotango a li a kwatele oshiindingili shoSanlam Music Awards komeho pethimbo Gazza a li ta ulike uunongo we.
Kakele kwaashoka, K Boz oye ishewe a li omuningi gwomikwelengendjo kaahikingalo ngaashi Gal Level, Dogg naGazza. “Onda ninga ishewe omikwelendendjo dhuungalo waahikingalo ngaashi Exit, Mushe, Tequila nayakwawo oyendji,” K Boz ta tsikile.
Konima yaashoka, Dj K Boz okwa lombwele aasapoti ye ya kale ya tegelela oshindji kuye omvula ndjika.