Oilyo keumbo lomutumba wopashiwana oya tumbuleka ou a li ngoloneya mukulu nakufya James Unomasa Uerikua tai ti okwa li omulumenhu omunandjungu e na landulafano.
Uerikua naye okwa li oshilyo sheumbo lopashiwana a kalela po ongudu yoSwapo.
Omudo 2020 okwa ulikwa a ninge kongoloneya woshitukulwa shaOtjozondjupa fiyo omudo 2025.
Okwa yakula nawa oshiwana nokuyambidida ovanyasha.
Uriekua okwa xulifa moshiponga shotuwa mexuliloshivike lopaasa pokati kondjila Okakarara nOtjiwarongo pefimbo kwa li tava I konaviheke pamwe nounona osho yo omukulukadi waye.
Omonamati woshiveli weedula 14 naye okwa xulifa tuu efiku konima ashike a ninga okafimbo kashona meshipangelo shaTjiwarongo.
Uriekua okwa kala nokuningilwa omaxupulifo a yooloka ngaashi kOtjiwarongo, Gobias osho yo koWindhoek peumbo lavo.
Etitatu Omupresidente Netumbo Nandi- Ndaitwah, oilyo yeumbo lomutumba wopashiwana noilyo yekeumbo lopashiwana etivali osho yo ovanapolitika veendodo da yooloka okwa li va holoka momwaalu muhapu okuyandja efimaneko lavo.
Pefimbo lexupulifo oombushe moilonga va Uerikua okwa li tava imbi omaimbilo okutumbaleka oilonga iwa ya longwa kuye.
Oshiwana okwa li shanyika oluhodi ta shi li omunyasha kwa li e na oukwatya tau hokifa.
Ova popi va yooloka ova hokolola tava ti Uerikua omulumenhu a fiya po oshihopaenenwa sha pumbwa okulandulwa.
Omukwatakanifi keumbo lomutumba wopashiwana, Saara Kuugongelwa-Amadhila okwa ti efyo laUerikua ina kuma ashike oilyo yeumbo lomutumba wopashiwana ashike efyo laye ola nyenyemateka oshiwana ashike shaashi okwa li a pewa oshinakuwanifa shokulela po oshiwana keumbo oko ha ku ningwa omatokolo.
“Alushe ngeenge e li meumbo lomutumba wopashiwana okuhole elandulafano noukumwe. Okwa li omunambili, e hole okuninga omashendjo,” ta ti.
Okwa ti ngeenge owa hange a pewa omhito yokupopya iha kwata efimbo lihapu, yee oha popi aukilila poshitwa.
Kuugongelwa-Amadhila okwa ti eumbo lotumba wopashiwana ola ka nifa omulumenhu kwa li a longo noudinini.
Ovaleli veengudu domhilameno navo okwa li va mona omhito yokuyandja oipopiwa yavo omo va hokolola tava ti ova kala ve na ekwatafano liwa laUerikua, yee okuhole okupukulula ovanhu.
Ovanafikola ovahongifikola va dja koWindhoek High School navo okwa li va holoka lexupulifo okundja efimaneko lavo ku Venturo.
Omunafikola Venturo okwa tanga ta kutiwa okwa li e na omaano nomikalo diwa.
Uerikua pamwe nomomanati otava fudikwa Osoondaxa komukunda Otjiserandu.
fhamalwa@nepc.com.na