Omukainhu weedula 34 okwa tambulilwa moshipangelo shaNgela konima eshi a monifwa oshiponga kumushiinda shaye shaashi vati e mu anyena oikulya. 

Oshiningwanima osha ningwa oshivike sha dja ko kolukanda Omusambwa kOshikango efimbo lokomatango. Omupopiliko wopolifi Deputy Commissioner Kauna Shikwambi okwa koleka oshiningwanima eshi. Opolifi oya hokolola tai ti nakuninga oshihakanwa okwa dengwa nekende nokonima okwa tetwa nekende. Opolifi oya hokolola tai ti omufekelwa okwa pula omukainhu opo a lye mo moikulya yaye. Otaku hokololwa kutya okudja opo ova tameka tava tanguna nokulituka. 

Vati omufekelwa okwa tameka a handuka naashi osha eta opo a monife oshiponga omushiinda shaye. 

Ina kwatwa po natango, omakonakono opolifi otaa twikile. Natango moshitukulwa shaHangwena, omwa lopotwa omulumenhu vati a monifa oshiponga omukainhu waye nekuva. Oshiningwanima osha ningwa oshivike sha djako komukunda Onakalunga. 

Otaku hokololwa kutya omufekelwa ou okwa kala shito a ningila omukainhu waye omatilifo. 

Omufekelwa ina kwatwa po, noomakonakono opolifi otaa twikile. Opolifi oya kumaida oshiwana opo shi kala tashi lopota omahepeko omomaumbo pefimbo. 

-fhamalwa@nepc.com.na