WINDOKO – Liluko lelibona zalituto zepahami ni bupangapanga lizibahalize kuli katengo kane kaketilwe kuli kabate linzila zeñwi zakufumana masheleñi, akekezo mwakutusa katengo kakalifela baituti kakazibahala ka NSFAF kafelize musebezi wakona. Taba yeo nepatuluzwi kisibuabui waliluko Selma Ngola, yana fitisize buitumelo bwaliluko kwakatengo, kapiho sakata yesupeza kuli nebasebelize katata, mwakubata linzila zakufumana masheleñi kutusa katengo ka NSFAF. Kamusulo wacwale olikana lulelule nilikititi zemwanda kazemashumi amalalu kazelobapeli (N$1.138 billion). Katengo ka NSFAF kakona feela kulifela baituti babalika 2 925 hala ba 24 739 bane bakupile silimo se. Nihakulicwalo likupo ze 9 650 hala likupo zene amuhezwi nelisikafita famayemo atokwala.
Ba 15 087 nebasikakonwa kufiwa tuso. Baituti babazwelapili bakona kulifelwa mali alikana lulelule nilikiti zemashumi asupile ka asilezi (N$1.076 billion), katengo katuso yamasheleñi nekabulezi. Katengo ka NSFAF kabulela kuli hala musulo okafilwe kusatondahala mali alikana bolule bamyanda yemashumi asilezi kalikiti zemashumi amane kasilisiñwi (N$641 billion). Bakeñisa kutaeliswa koo, likitikiti zabaituti babonahala kusafiwa tuso yamasheleñi amuuso. Buñata bwabaituti babatokwa tuso nebapalezwi kuiñolisa mwakalulo yabubeli kwalikolo zepahami. Taba yeo netisize kuli baituti balikolo zepahami bacaule, ili kone batambekile liñolo la lipilaelo zabona kwakatengo ka NSFAF nililuko lalituto zepahami, mone balaela kuli kaufela baituti babaswanelwa kulifelwa, balilifelwe kusabilaezi kuli bakena kai.
Ngola napatuluzi hape kuli liluko lalituto zepahami kaswalisano nilikolo zepahami, nebalumelelani kuli baituti babalifelwa kikatengo ka NSFAF baiñolise kwalikolo kobakena. Nabulezi hape kuli liluko lalituto zepahami nelitokwa kuli katengo ka NSFAF kapatalaze mabizo abaituti babalifelwa kuli liñolisa zabona lizamaye hande.
Nabulezi kuli liluko lalituto zepahami likumalela kubona kuli tuto sakata ifiwa kwasicaba sanaha. Kakuhatisa lituto sakata nimapurojekiti alumelezwi. “Lubata kuitumela kwabaituti nikamaiso yabona kakutwisiso yabona kutusa muuso mwanaka yeo, mi lulakaleza baituti kueza hande mwalituto zabona,” nabulezi. Muetapili waliluko lalituto zepahami Alfred Van Kent naize liluko lilemuha kuli baituti babalifelwa kikatengo ka NSFAF bana nikuñola tatubo hamoho cwalo nikuiñolisa mwakalulo yabubeli yatuto. “Nikafo liluko litalima tokwahalo yamasheleñi abaituti kuba taba yabutokwa,” nabulezi. Nabulezi hape kuli kuzwa kweli ya Lungu silimo se, nekubile nimikopano kutalima hala tokwahalo yamasheleñi abaituti.