Auleria Wakudumo 

Olopota yomudo 2024/25 otai holola kutya Ovanamibia ve dule peemiliona 1.26 oveli natango momhumbwe yoikulya.Eshi osha hololwa kOmuprima woshilongo Elijah Ngurare pefimbo ta tambula ko ekwafo lopashimaliwa la nuninwa eendja, olo la yandjwa kepangelo laJapan oshoyo koEuropean Union (EU). “Eshi osha hala okutya eepelesenda tadi tengenekwa dili po41 odili momhumbwe yoikulya natango moshilongo,” Ngurare ta ti. 

Epangelo laJapan noEuropean Union (UE) ola yandja ekwafo lopashimaliwa shi fike peemiliona N$32 koshikukuta moNamibia. 

Omuprima okwa holola olupandu kepangelo laJapan naEU eshi tava twikile okukwafela Namibia moshikukuta. 

Odula ya dja ko, Japan okupitila moprograma yoikulya younyuni okwa li a yandja oshimaliwa shi fike poUS500 000 kuNamibia. 

Oshimaliwa eshi osha li sha kwafela moitukulwa imwe oyo yali ya tofwa mo molwa omhumbwe yoikulya. 

“Natango odula ya dja ko, EU okwali etu pa okupitila mehangano lomushiyakano utilyana oRed Cross oshimaliwa shi fike pee£200 000. Oshimaliwa eshi oshali sha kwafela ovanhu o140 000 noikulya, omeva, oshoyo oukalata woshimaliwa shoshikukuta shoule wodula,” Ngurare ta ti. 

Omuprima okwa holola kutya Namibia ngaashi oilongo ikwao imwe oya divilikwa koshikukuta oule weedula da dja ko. 

Okwa ti nonande Namibia a kala noshikukuta oule weedula da dja ko, shomudo 2024/25 osha findila unene vahapu kongudi unene avanafalama vanini. 

Ngurare okwa holola yo kutya epangelo otali tula moilonga omikalo tadi kalelele okufinda oshikukuta moNamibia. 

Nonade epangelo la ninga eenghendabala dimwe ngaashi okufa omatale omeva neemboola, natango otali pumbwa oshimaliwa shi fike peemiliona N$600. 

Ngurare okwa kwashilipaleka kutya natango oshimaliwa osho sha yandjwa otashi ka kwafela ovanhu ava veli momhumbwe. 

-wakudumoauleria@gmail.com