ǂHatsamas 283, hîa ǁaupexa 60 kilometerga ǀGordabes !auga ǁgoe tsî ǁîs tsîna ǀAeǁgams !Garo!ā ǁhûi!nâǂharis !nâ ra ǁnās ge ǁgam-i ǀorosib ǀkha ǂnôa.
ǁAnǂgāsaben ǂHatsamas din ge ra !gaesen, ǁîn ǂgaoǀkhāsa ǁgaragu WHOs digu ai !omna ǁās ǂnamipe a dīǀoaǀoa ǁoasa ǁgam-i ǀorosib xa ra !aromahese, nēs kaise nē ǁaeb Covid-19 dib ai ǂurusib !harib ai a ǀgaisa ǂgaoǀkhā xawe.
“Sida ge kurigu !oede ǀnai nē !gomsib ǁgam-i !nubusib dib ǀkha !goaxa tsî sida !gomsigu tsîna xoakhâi tsî ǀkharisi ǀawemā!nansa ge mā, xawe nēsis kōse hui-e hō tama hâ.
Sida ûigu ge kaise !aorosa mâsib !nâ hâ, hanas Covid-19 nē ǀkhāb ǁga nî ǂapaǂoas karao,” tib ge ǁanǂgāsaben ti ǀguib Elvine Vissera gere !gaesen.
“ǀGui timî tsîs ge !nau-amsa a hâ, os ge aitsama mâbasen ǂnûiǂgās tsîna ǁgam-tenksa hā-ūsa ge ǀû, xawes gere hās tsîna !haese gere ǀkhai!nâ, ǂgui khoeda ra sîsenū amaga.”
Visseri ai!â gere mîsa !oas ge ǀKhomas ǀKharisi ǀAwemā!nansa nē kurib tsoatsoas !nâ ǂHatsamas ǁanǂgāsabena ge ǀawemā, in ǂganamsensa dī, tsauba khaobahes !aroma. Mîhe ge khamin ge ǂganamsensa ge dī, xawe noxopa !eream-e hō tama hâ.
“Hoada ge ra ǀawemā tsî ǂgaoǀkhāhe !omna da hoaǁae nî ǁāsa Covid-19 khoraǂuisensa ǁkhaes !aroma, xawe mâtits nēsa ra dī ǁgam-i ose,” tib ge Vissera gere dî.
ǀKhomas ǀKharisi Dana Sîsenǂuira Mâisab, Clement Mwafilab ge dî!nâs ai ge mî, nausas nē aitsama a ǀhonkhoe-aihe !garo!āsa noxopa ǂhanub xa ǂhanusise ge ǂan!gâhe tama hâ i, xawen nē ǁanǂgāsabena ǀhûhâsib ra !khō!oa!oase paigu ǁgam-e nî hōsa.
Mwafilab ge ge mî, ǁîn di xoakhâib !nâs nē !garo!ās tsîna ǁgam-e nî hōse ge xoamâisa isa.
“Ama I ge, ǁnā !garo!ās khoen ǁgam-e ūhâ tamasa, teks an ge ǀoro amaga. Sida ge a ǁaxa tenksa ǁîna tenksa hōbasa in gam-e ūhâ ǁkhā.
Nē wekheb !nâ da ge tendersa nî māǂui, in tsauba khaobahe tsî ǁgam-e hō,” tib ge sîsenǂuira mâisaba ge mî.
“ǁAnǂgāsaben ūhâ ǀoro tenks ge kaise ra ǀgam, xawe da ge ǁkhā da a-i hoa-e nî dī tsî ǀasa tenksa !hae ǁaeb !nâ ǁamaba ni,” tib ge ge ǀamǀam.