Ministris ǂNamipeb tsî !Narisarimas dis ge ge ǂanǂan ǁKhaubasa !Âgu tsî !Aubxūn Kō!gâs ǂHanumā Aoǁguib ǁîb di ǀuni !harodi kō!gâ hâsa Kabinets nî !khō!gâs ai!â. Nē aoǁguib !nâ gu ge ǁgaraga a aoǁguisa ǀkhamasa ǁkharagu !au-aon !oa-ai nî sîsenxagu diga. Ministeri, Ministris ǂNamipeb tsî !Narisarimas dis dib, Pohamba Shifetab ge ge mî, ministris !kharaga !âǀhuru-aon ǀkha ǁgamǁaredi !nâ hâsa, !gōsase Ministris ǂHanu-aisib dis ǀkha, ǁnāǀ khāba xu hâ mîǂgāga hōs nē aoǁguisa ǂhanumās ǂnamipe.
“Sida ge tsēkorobe ǁgamǁaredi !nâ ǁnâu!gâ!khaigu ǀkha hâ !ûǂamaon ra ǁgui-aihe ǁkharagu ǂnamipe. ǁKhāti da ge !garise ra sîsen ǁKhaubasa !Âgu tsî !Aubxūn Kō!gâs ǂHanumā Aoǁguiba dītoas ǀkha, ǁîb !nâ da aoǁguiga dī hâse ǀkhamasa ǁkharagu ǁkhaubasa ǀgurun ai ra dīhe !ûǂamdi ai nî sîsenǂuihe ǂnamipe,” tib ge ministera ge mî. Nē ǂhanumā aoǁguib di ǂgaekhâisa ge ǂgaoǂgao!nâs ge ǁkhaehe ǁoasase ra ǂharo !audi ǁkhaubasa ǀgurun, !gōsase !uri !naban, ǂnū !naban tsî ǂkhoan Namibiaba ǀgaisase ra tsâǀkhāna ǀariǂuis aisa. ǂOago kurib !nâb ge Namibiaba 24 !nabade ge ǂoa!nâ tsî nē kurib !nâ 60na.
ǂKhoan ge ǂoago kurib !nâ 78se ge !gamhe tsî nē kurib !nâ 23 ai ǀnai mâ. ǀGūǁae ge dīhe !gôakhâib ge ra ǁgau nēsis kōse ge Etosha ǀGuru!hanab !nâ a !gamhe !naban 54 ai mâsa, nau ge !gamhen ge Kunene ǀKharib !nâ Palmwags di ǁkhaubasa !âb !nâ a hōhesa. Shifetab ge !aruǀî ge mî, ǀhûhâsigu ǀkha nî ūhâhe ǁgamǁaredi nē ǂhanumā aoǁguib ǂnamipedi Gamaǀaeb di ǀams tamas ka io ǂKhoesaob di tsoatsoasa a ǀaweǁguisaba !khaisa. Ministris ge nē soab ai !Hū!nāsi !Aub!ûi!gâs ǁKhaubas tsî ǁAwosasib Komitesa ge !amǁare hîa ǂhâbasa !hoaǁares īǁkhāsiga nî māsa harase di !hoaǂharugude nî dīhese. Nē komites ge hoa !kharaga ǂnûiǂgādi ǂhanub didi, ǂnûiǂgādi, departemendi, ǀhûhâsigu !nandi ǂnûǁkhaeba-aon ǀkha ǁaekorobe ǂnûde nî ūhâ, ǁnāpan nî aweǁguisa ǁaxasin, sîsenǀgaugu tsî dā!harodi nē !gamǂuisa ǀariǂuis ai nî sîsenxade !hoaǂam tsî aoǁguiga dīse. “Sada ǀguru!hanagu, Etosha ǀGuru!hanab khami i ge ǀhûhâsigu tsî ǂgari-aon xa hâ ǂnamihe hâ. ǁNā-amaga i ge kaise a ǂhâbasa nē khoen nî !nāsase hōhō!nâhe tsî ǁkhāǁkhākhâide !khō!oasa, ǁnâu!ān nîse ǂhâǂhâsasib !aubǀgurun tsî ǁnāti ī ǀguru!hanagu di hâs disa !khaisa,” tib ge Pohamba ge mî. ǀHûhâsigu tsîn ge !âsa ūhâ ǁîn nî ǀhurusa, !hao!nāsi ǂgaeǂguidi tsî !aub!ûi!gâs di !nandi !nâ-ū, ǀamǀams nē !audi dis tsî !gamǂuidi nē ǀgurun ai ra dīhede ǁkhaes !nâ-ū.