Ba bane ba ne batamilwe la Sabata kwa Kamutjonga ka kufumaneha ni manaka a litou a ketalizoho ka amane, neba bonahezi pili a kuta ya kasiwela ya Ndiyona la Bubeli.
Kuta ya kasiwela a ki kuta ya kazazi kapa ya kasunda kono ibanga fela kwateni akuna ni litaba ze swanela kutalimwa mwa silalo seo. Sibaka sa Ndiyona sifumaneha libima ze mwanda ka ze mashumi a mabeli (120 km) Upa wa Rundu. Ba ba kulubelwa ba bane, ki Djami Kamana Joseph (38) wa sipepo sa Namibia, Ndhara Ngocho (34) ni Sheks Chombo (30) ki bayahi ba Botswana, ni Ngambole Alberto (48) wa naha Angola, ba bonahezi pili a muatuli wa mulao Barry Mufana, muzekisi neli Albert Titus. Muzeko neushimbululezwi ka la 15 Mbuwana unumwaha kufa mapokola nako ya lipatisiso, kono ba bakulubelwa nebahanezwi kupo ya kulifa mali kulibelela muzeko kwande a tolongo, kacwalo bataba siala mwateni kufitela bakatoipiha lwa bubeli.
Ba bane, ba bakulubelwa ne batamilwe kwa Kamutjonga mwa nako ya musecho o neuezahezi la Sabata ka hola ya 07h00 kakusasana ko neba fumanehile ni manaka a keta lizoho ka amane. Kufumaneha ni manaka a tou ki mbamba kacwalo ki mulatu. Mupokola wa lipatisiso, Chief Inspector Mubebo wa Upa wa Kavango u ize musecho neutile ka kulumwa zebe ki sichaba. “Sina amulemuhile kuli lupatehile kubatisisa likezo za kuzuma isi kamulao mwa silalanda sani, kacwalo ka kulumwa zebe ki sichaba kuli ba bakulubelwa nenze babata baleki ba manaka, selu tateka lipatisiso ni kubaswala. Muyahi wa Namibia ya akalezwa u simuluha mwa sibaka sesiswana, ba bamwi nebatilo kopana ni yena, kwa talusa Mubebo.
Kala 3 Lungu, tou nefumanwi i shwile ni matuma a malumo kwa munzi wa Muitjiku Upa wa Kavango mwa sibaka sa Wiko wa sibaka sa lifolofolo sa Bwabwata mwa silalanda sa Mukwe. Tou neifumanwi la Bufaifi kakusasana ki bolyaminzi bao neba zibisize mapokola kwa Divundu. Nekufumanwi kuli neibulailwe. Lipatisiso nelifumani kuli nena ni matuma a mabeli a malumo, taba yetisize kuli kulemuhiwe kuli neibulailwe. Ka kuya ka mapokola, tou neifumanwi i kwanile ni manaka a yona, mi kufumanehile kuli mazumi bao nebalemuhile kuli neba limbuluzwi.
Kubile ni kuǹatafala kwa lipiho za kuzuma litou ni liembele isi kamulao, ka kutalusa kuli litou ze lishumi ka ilimwi ni liembele ze ketalizoho ka zepeli selibulailwe ona silimo se feela mwahala naha Namibia.