RUNDU-Sipangero sosipe sopaumwene sahana asi sepangero kasipaturukire modoropa zaRundu, omu sina kara asi tasikara nye simwe sina kuvatera vantu kuhamena komauvera modoropa zina. Omu vana kuyimona wovanzi asi kuna kara nye evango eli nalikavatera vantu momukunda gwina ntani kuna kuvatera nye epangero konomukaro gwangesi.
Sheumoun Medical Centre, kalipaturukire modoropa zina momandaha gomazuva gavali gokwedi kwaNsinano 2015. Ndokotora Taati Ithindi ogu ana kara asi yige mwenya evango, katente asi evango eli kuna kara nandokotora, vanamberewa vane, gumwe gepevero ntani mufili sinka evango lizere. Evango eli nail kakara nevango lyalyene mokurandesera nomutji, ano elikwamo lyangesi kuna kara asi kuna kulirugana. Ntani ngatukara nogugokuhakura mazego. Ose ngesi tuna lituramo asi nayinye eyi yahepa kusika mouta wakora moomu tupu tuna yidiva asi nayniye eyi kapi ayihoroka sikando simwe tupu, yimo ana kutanta Ithindi.
Sipangero esi sopaumwene nasivatera vantu momunene. Gumwe gatunga moRundu katupulire, katente asi hawe ngesi doropa kuna kukura yipo asi nombatero dokulisigasiga dina pumbwa rambangako nouhaku wovantu. Ano mwenya sipangero age katente asi munendi gumwe kwayalirongerere modorpa zaRundu, ano makura yipo gatokora asi takalirongera undokotora ayahakure moomo ngatamekera kukara negano eli lyokulirongera uhaku.
Ose ngovakondi vendi yipo tuna yimono asi mulyo unene, twahepa kutameka nelikwamo eli yipo asi apa ngakamanena alyo evango eli ngayarugana lina wapa nare. Doropa zaRundu kuna ligwederere patatu pakare asi vatungimo ndi vadinguli. Nkenye oku nopita tomono asi hawe tuna kara nodoropa zina kuza komeho, yipo nye asi toyipandwire egano lyepangero mokukatura Nkurenkuru zikare doropa zonene morwa komalima ogo tuna yuka evango eli vatura asi yimo zahagera doropa zaRundu nomatungo novantu kapi ngayigwaneka nayinye ngayikara yinapata.
Mpandu epangero eyi lina kuliza novantu ntani mokutara asi ngapi tuna kuza komeho vakaturepo hena doropa zimwe koDivundu yipo asi vantu vetu vene vahepa kutokora asi tazi koRundu ndi koNkurenkuru ndi koDivundu. Navenye kuna kupandura asi nawa ngesi ava vanahara kuza nye kosipangero sopaumwene vahepa kuza yipo asi twahakakara asi elipaterekedo kosipangero sepangero saRundu. Ntani epangero nalyo kuna kurugana omu lina kara asi kuna kuhanesa yipangero yipo vavatere vantu konomukunda dokulisiga.
Ehundiro katugwene asi vantu vetu unene vanona vahepa nye kulirongera uhaku yipo asi tukare novahakuli vanyamwetu ava vana kutufira sinka, kapisi tuhuguvare tupu kwava vana kutunda koyirongo peke ezuva limwe nawo ngavakatokora asi tavatengurako ngapi nye ngaturugana ntani ngatutameka nose kudeura ndi kutuma vana vetu vakalirongere uhaku ndi? Mavango gokulirongera pogeli rambangako nkurusure zetu UNAM, nakokwakarako evango eli nolirongera toyakara muhakuli gomunene.
Vana vetu vagara, novakadona mwahagcakwisa siruwo esi guseni mavango aga muna kumona asi kuna pumbwa vantu yipo neyi ono kumana kulironga ove kuna kukundindira oyagwane sirugana.
Mpandu gegano lyokuyapaturura sipangero sopaumwe moRundu nye yahepa kuvhuka moNamibia yipo tuvatere muhoko gwetu.