Ovakwashiwana vaAngola hava landifa omahooli kOshikango otava nyenyeta tava ti ova ninga oihakanwa yokunyekwa oimaliwa yavo kOvanamibia.
Pefimbo Kundana a talela po eengamba daAngola naNamibia kombinga yaShikango ova ti ngeenge tava landifa ohava ponokelwa kOvanamibia tave va pula oimaliwa oyo va landifa. Omulumenhu weedula 25 Omuangola okwa ti keengamba kaku na vali eameno ngaashi kwa li nale ku li molwaashi ovanhu ohave lidenge noshoyo okudenga eetuwa dovanhu. “Ovanhu ohava kala va hondama koshi yomiti va teelela tu landife,” ta ti.
Omukainhu umwe ha landifile koshi yomuti keengamba okwa hokolola ta ti oha ningilwa omatilifo kovalumenhu tave mu pula oimaliwa.
“Ohatu kondjo hatu landifa oinima yetu nokukonga ouxupilo moNamibia ashike paife ohatu nyekwa omaliko etu,” ta ti. Ovanamibia navo ova ninga oihakanwa yokunyekwa omaliko avo ngeenge tava di moAngola unene tuu ovakainhu.
Eengaba paife oda ninga onhele yetiko lohonde, ovanhu otava dengwa nokumonifwa oiponga kookalyamupombo ile kovanambelewa vopolifi.
Efimbo longula kOshikango ohaku kala ku na omikweyo diledile deetaksi de uya okunwefa omahooli kungungula.
Oitaashi yomahooli mOshikango ihai mono vali eetuwa dihapu dokunwefa omahooli sha etwa konghalo yangungula.
Lopokati opo, omukulunhu koshikondo shokukonakona oimbuluma omupedu Commissioner Zachariah Amakali okwa ti nonande opolifi tai twikile okuninga eenghendabala nokukelela
Ovaangola vaha landife vali omahooli moNamibia, onghalo yokulandifa omahooli onghee ngaa tai twikile. Omandini e dulife po2000 oku li poshitaashi shopolifi kOshikango konima eshi a kwatwa ko.
Okwa ti okwa didilikwa yoo vali Ovanamibia vamwe navo hava landifa omandini omahooli momaumbo avo unene tuu omikunda odo di li pomudingonoko waShikango.
Okwa ti opolifi otai twikile nokulonga noudinini okulwifa oumbudi vokulandifa omahooli molwaashi inashi pitikwa.
fhamalwa@nepc.com.na
Caption: Tava nyekwa… Ovaangola tava nyekwa omaliko avo keengamba.
Efano: Festus Hamalwa