ǀAUS – Kaise a ǀgaisa !khaib mâsib Namibiab !khawagas !nâb ge go !aroma ǂgari-aon hîa ǁKharas ǀkharib !nâ ǂnôa ǀAus !garo!ās ǂnamipe ǁan hân go ǁaupexa 150 gūn tsî pirina a ǂoa!nâsa. Nē ǀgaisa !khaib ge ǁkhāti ǀkhamasa ǂoab tsî ǀnanub ǀkha goro !gûǁare. New Erab ǂhôare-ao-i ge ǀgui ǂgari-ao-i ǀkha dî!nâǁgamǁaresa go ūhâ i tsî goro ǂan ǂgao, marisi-aib ais nē ǂoa!nâsa mâti ī sîsenǂuiba ǁîb ai go ūhâsa.
Nē ǂgari-aob, John Booisi ge ǂgariba xu ǀgui ra ûi tsî ǁîb ûitsamaxūn di ai!gûsa ǁnās ai !gâbasen hâ. Booisi hîa ǀhûǁarebese ra ǂgari-aihe !garo!ās ai ǀnî ǂgari-aon ǀkha ra ǂgarib ge ǀhaob ai 56 gūn tsî pirina ǂoa!nâ hâ.
“Nē mâsib ge ǀgaisase go ǂnau te tsî ûiba go khao-oa kai nē ûitsamaxūn ai ǀguib ti ûiba !gâsen hâ ti omarisa ǂûmas !aroma xui-ao,” tib ge Booisa nē ǂhôare-ao-e gere mîba. Nausab, ge ǁîba ra gangan hoaraga 184 ǀuiǀnūxūnab ge nē ǁkhōǁkhōsa !khaib tsî ǀnanub di mâsib !nâ ǂoa!nâ tama a i !khaisa. “Tita ge ǀkhomsens ǀkha ǂnû-oa tsî ǀgâb !nâ a māǁnâsen ǁoa, xawe ta ge khâi tsî ti ǂgarib ǁaxasin ǀnai ta goro dīn ǀkha nî ai!gû tsî ǀnai go is xa !nāsase ǀgaisase nî sîsen, î ta ǁkhawa !gôaba ūkhâi.
Tita ge !gâi mûǂuib tsî turab ǀkha !goaxa ǁaeba ra !gû!oa,” tib ge ǁkhoaǂgaose gere ǁgâiǂuisen. ǂHôare-ao-i xab gere dîhe, ǁkhawab nēti ī mâsib !nâ hâ ǁkhā tides !aromab mâti nē mâsiba a ǁkhauba ǁkhās ai ge hâ i dîis aib ge Booisa ge mî, ǁîb nî !khaib !oagu a ǁkhaeba ǁkhā ûitsamaxūn âba ǁgâuǂnamiba ǀaweǁgui tsî sîsenxa kaisa.
“Nē mâsib ra !gâi ǀkhāb ǁga ǀkhara hîa ta ge ǁkhaubas ǀawedi ǀkha ra tsoatsoa,” tib ge ǁîba ge mî. ǂHanub ǀkhāba xu-i kikide goro !khō khoe-i ǀgui-e nēsis kōse go hā hâ i, xaweb ge a ǀū ǂhanub ǀkhāba xu-i hui-e nî hāsa, tib ge Booisa gere mî. !Namiǂnûs ǁhûi!nâǂharis ǂgiǂgosi ǀawemā-aos, Susan Ndjalekas ge ge mî, ǂGuro Ministers Berosa xus ge !nuriba sîǂgāsa a ǂganhesa, nē mâsib ǂnamipe.