Vahakuli mosipangero sepangero modoropa zaOpuwo kapi vana kara noruhafo mokukwama elikwamo lyawo lyovarugani ava, omu vana kuyimona awo asi nomvhura dononzi kapi pwana wiza erunduruko nkenye, ano siruwo oso vantu vatungamo kuna kuligwederera.
Vahakuli ava kavatente asi awo kuna vagumu momunene eyi yangesi, makura awo kuna kurugana unene momukaro gomudigi morwa usesu wovahakuli mosipangero sepangero, ano awo ngesi kuna kuhundira ministeli vakute pangenderera varugani ava wokugava uhaku.
Sipangero esi kuna kara sipangero sosinene momukunda gwaKunene, ntani awo kuvatera vantu wokuvera vatunga moOpuwo ntani nomukunda dopopepi. Vahakuli mombilive zawo, kavatente asi awo kuna kurugana novili dokupitakanene,aw okapi hena vana kuvafuta novili odo, morwa kwakara asi novili dokuturamo ehundiro ogwane yimaliwa gwederero kwakara asi 40 tupu.
Mbilive ezi kavazitumine komukurona gendesi mberewa ndi ministeli Ben Nangombe, koministeli zoukanguki moutatu una puko. Awo nawo vamwe vana kuhundira ministeli asi zahepa kufuta novili nadinye ntani vahepa kuvafuta yimaliwa yawo nayinye neyi yono vili dokugwedako, kapisi vavature tupu asi novili 40 yido dakahurako.
‘’ Ose, vahakuli woOpuwo, ngesi yina turorora eyi, morwa nayinye eyi atusivana kwato ogu ayipurakene nokutara asi ngapi nagusapo udigu ou vakare vakondi vetu wosipangero esi, ndi nompitisili domukunda nawo kwato eyi ava ruganako, yimo ngoso vana kuhunga mombilive zawo.
Mokugwedako vahakuli kavahundilire hena asi mukurona gwana gosipangero esi vahepa kumurundurura, ogu ana kara asi Thomas Shapumba, ogu ana kara asi kwato eyi aryuganako komasivano gawo nomvhura dononzi.
Age simpe kagamutembe makuye asi kapi gakara nefumadeko kovahakuli ava, nokumutanta asi kapi gakara nomukaro gomuwa. ‘’ Ntani ose kuna kuhundira mukurona gwetu vahakuli asi vamugusepo pevango eli, morwa age kutuninkiliramo ntani kapi gahara kurugana nagenye ogu kwakara nokatongotongo. Ose kwamona vandokotora womoNamibia kuna kutunda posipangero apa vakatrugane kopeke morwa mukaro gwendi mudona unene.
Ntani awo kuna kuhundira asi sipangero vahepa kusiwapukura, omu navawapukura evango lyovahakuli ntani kanzugo kokulivaterera vahakuli. ‘’ Mokukwama nye asi yina kara pangenderea, awo kuna kuhundira asi navahafa nep[u yikara asi vanagwana elimbururo mokatji komazuva aga murongo.
Yimo ngoso vana kugwedako. Nonkambadaro asi vagwaneko nkumbu kwaShapumba kapi kayitompokere. Apa kahuyungire kosayitunga zaNew Era, hamutjanga ntoni gombunga zovahakuli Namibia Nurses Union (NANU) Junias Shilunga katente asi age anahafa mokumona vahakuli vana sikama vamoneke kowo ava gazara asi awo vahona ntani kuruganesa vanesa ava moomu vana hara. Vaneresa vantu vahepa kurugana momukaro gomuwa, yimo asi yivawapere vagave sirugana sosiwa kovaveli vetu, yimo ana kutanta.
Nangombe katente asi mberewa zendi simpe kapi zina gwana mbili zangesi, ano nsene nanizigwana hawe natugava yitundwamo yetu ndi asi nkumbu zetu pangenderera.
–fhamalwa@nepc.com.na