Omakotokero wozondekurona zOtjiṱiro Otjindjandja okuza kOtjauana Oroviungura nda zuko otjiraisiro tjimwe tjokuhinokuundja otjisuta Kovandoitji.

 Nu nangwari momuano umwe poo warwe ozondekurona ozeni mu za sokuuta okupaha okuri tumununa no ku rikotorera imbi ovati novanene vizo mbi va opandjara no ku yekua. Ku yeurwa indji ndji mai riroro. 

Umwe wOvahaamise wOvihavero vyOkomiti ongayendise yoviungura vyEhika rOzombara zOvambanderu nOvaherero ra Kandjoze, ndi tjiukwa otjOchiefs’ Assembly, ousupi OCA, Mbakumua Hengari, ma tja. Ama hoha kOmuhaamise wOvihavero vyOCA nai, Ombara Onene, Tjinaaṋi Maharero. Eye ngwari umwe wovanane vombazu pekepeke vehika indi, mba  kayakurire ozondekurona.

Maharero wa raerere ongoramambo indji Onew Era kutja omakotokero wozondekurona nḓa otjizemburukise otjiihamise komuhoko mbwa hara okuzengisiwa kombanda yevaverwa. 

“Imba ovandu mba pandjarisa omihoko vyao kovimbirinyama mbyaai sapere oturova twavo oviriwa owo okuza nokuundurirwa mokuti onguza ku ku hi notjari,” ma tja. 

Na weza kutja omakotokero wawo kaye sere kurira otjiwova nomukandi porwe mbu hi nomaheya nungwari korusenina maye sokutwara kotjisuta tjOvaherero nOvakwena. 

Mena rokutja verikotorere, Hengari otji ma munu kutja omuano warwe wongondjero yotjisuta tjinga ave ha panḓererere mOtjauana. Mokupaha otjisuta kEhi rOvandoitji, oro ndi tjiukirwa kOtjiṱiro Otjindjandja. Hengari ma tja ozondekurona inḓa okuvanga nokupaha okukotoka kehi rawo, okuripahera otjisuta nokuhino’ kuundja komundu warwe tjimuna Ehi rOvandoitji. 

Po siya ngunda ape ri nao ma tja ngunda omayakuriro wawo kaye yarira okuveyarura pu va ri tjimuna ingo waimba mbe ya rukuru nu ngamba mba kaumbwa mOngama. Ngandu tji va handurisiua mozosarama ndano ohoromende ndji maku zu ye ve randera.