Iuze Mukube

Mazazi akukala muzeko wasitangu sa Fishrot aka patalazwa Labubeli, muatuli mwa Khuta Yepahami nazibahalize. Mazazi natomilwe kuli muzeko tota uzwelepili. Muatuli mwa Khuta Yepahami Claudia Claasen nazibahalize kuiswa kwapili mwa mazazi ao muatuli Moses Chinhengo ya talima muzeko aka fumaneha. 

Taba ya sitangu sa peleko ya bundui ise ibile mwa khuta lilimo zebato eza liketalizoho kuzwa silimo sa 2019, ili kalulo yetisize kuli Chinhengo ñohola alaele kuli muzeko ukale kusina tiyeho. Taba tuna yene tisize tiyeho ki maikuto abao banyazwa akuli habana bayemeli, kacwalo kuzwelapili kwataba basina hande bayemeli ikaba kuloba liswanelo zabona za mutomopuso zeyelela nikuba ni muzeko osina silibonda. 

Zeo neli makilikicani abao bakulubelwa kuli kibona bacaindi ba sitangu sa fishrot, yene ili likwambuyu wa mulao Sacky Shanghala, ni ya nyazwa kayena James Hatuikulipi ni Pius Mwatelulo. Kono Chinhengo utiiseza kuli taba ise ilyehisizwe nako yetelele kacwalo ubata kuli babanyazwa baikalabele, ili kuli muzeko ukale unumwaha. 

Unumwaha taba ika zwelapili kasamulaho bao banyazwa mwa khuta neba ize habana kuitumelela mafosisa familatu balimbiwa kayona yemashumi amane kaye mibeli, ñohola. Shanghala ni banyazwa kayena batalimana ni milatu ya bulyangelino, buputeleli, bupumi ni milatu yeñwi ye ngunganywa kwa sitangu sa Fishrot. 

Babañwi banyazwa mwa taba yeo ki Ricardo Gustavo, Bernhardt Esau, Tamson Hatuikulipi, Mike Nghipunya, Nigel van Wyk, Otneel Shuudifonya ni Phillipus Mwapopi. Milatu izwelela kwa likakalezo za kuli baba nyazwa neba tusize kampani ya bundui kuzwelela naha Iceland, Samherji, kukena mwa lipeleko za bundui mwa naha Namibia kalinzila za bulyangelino. Ba banyazwa basiala mwa sitokisi kwa tolongo ya Windoko.