ETUNDA – Aantu omayovi oya gongala Etine kEtunda kOngandjera moshitopolwa shaMusati, okudhimbulukwa Omukokolipresidente Sam Nujoma.
Nujoma okwa hulitha momasiku 8 gaFebuluali nuumvo koWindhoek mepupi lyomimvo 95, konima yethimbo lyuuwehame uule.
Oshigwana osha holola oluhodhi, okupitila momaimbilo noku mu tanga omolwiilonga ye a longele oshigwana shaNamibia.
Daniel Shikongo gwomomukunda Etunda okwa ti, oya pandula sho ya etelwa olutu lwomukokoli opo ye mu tale lwahugunina koshipala.
“Otu shi uvite kutya omukokoli gwetu oku na okusimanekwa oshoka shoka e tu longele kandi wete pe na ngoka e shi tu ningila onkene omwenyo gwe naguvululukwe nombili,’’ ta hekeleke.
Bishop Kleopas Dumeni ngoka e li ngaashingeyi moshipundi shevululuko, moonkundathana naKundana kEtunda Etine okwa ti okwa kanitha kuume ke kopothingo ngoka a mono iihuna pamwe naye moshilongo sigo okombanda hoka ya li ya yi taya kondjele ombili yoshilongo shika.
“Otandi dhimbulukwa nawa sho kwa li nda yakele meme gwaNujoma koSoomi, “Gwakondo” , opo a ka mone osheeli she shoka a li a etha oku shimona konima yomimvo 26,” ta hokolola ngaaka.
Ta ti oshoka ye okwa li oshilyo shokomitiye yoongeleka muuyini okwa li e na ekwatathano ewanawa nokwa li oshipu kuye oku ya falitha kombanda nomikalo dhi ili.
Dumeni okwa ti, opo a yakele Gwakondo kOsoomi okwa li a fundju kutya ota ka pangwa oshoka ku uvite nawa nokwa li twe mu pe Nuusita Amakutuwa ongomupangi gwe, nonando elalakano ka li shi lyoku ka pangwa shili.
“Shoka kwa li tatu longekidha oGwakondo a ka mone osheeli she Nujoma. Shoka oshali sha eta enyanyu nohole pokati kaantu yaali yi iyetha nale,” ta popi ngaaka.
Bishop okwa ti Nujoma oku mu shi ongamikriste ngoka a kala a simaneka elongelokalunga nokuhole Kalunga.
Ta ti, Nujoma omuvuliki, omulumentu gwomenyo omwaanawa, kee na katongotongo.
“Ependafule lya ka lala, kuume kandje a ka lala, omwenyo gwe nagu vululukwe nombili,’’ ta ti ngaaka.
Minista gwomauyelele Emma Theofelus ngoka a li ta ga ndja uuyelele esiku ndyoka okwa popi kutya oshituthidhimbuluko shaTatekulu Nujoma otashi tsikile nena kEenhana koshitopolwa shaHangwena.
“Olutu lwaTatekulu sho lwa zi kOvenduka ohela olwa thikile kokapale koondhila ka Andimba Toivo ya Toivo kOndangwa. Olutu lwe okwa li lwa endithwa momapandaanda omanene sigo okegumbo hoka a valelwa kEtunda,’’ ta popi ngaaka.
Ta ti, inaya kundana nando uuwinayi washa sigo ya mana.
Theofelus okwa indile natango oshigwana shi longele kumwe natango nena, sigo taya mana okuninga oshituthidhimbuluko shaTatekulu moshitopolwpa shaHangwena.
“Natango otatu indile oshigwana shi thikame kooha dhopate ngaashi twa ningi ohela opo tu lalekeni Omukokolipresidente Nujoma,’’ ta kumagidha ngaaka.
Oshituthidhimbuluko shaNujoma osha gongalwa kiilyo yomutumba gwopashigwana ya yooloka okuza kiitopolwa yi ili noyi ili osho wo aantu yoondondo dha yooloka.