Auleria Wakudumo
Omukokolipresidente Sam Nujoma oye wotete okudimbuluka elelo lOvakwanyama konima yeedula da konda po 80 eshi ouhamba waMandume yaNdemufayo wateka po. Pefimbo ta lesha oshipopiwa ponhele yOhamba yaUkwanyama Martha Mwadinomho Christian ya Nelumbu mokapale ketanga mEnhana, omukulunhu woshikandjo shEenhana, Efraim Weyulu okwa holola ta ti Nujoma okwa dimbuluka elelo laUkwanyama nomalelo makwao eshi oshilongo sha manguluka opo omalelo aa e mu kwafele moipambele yopamufyuululwakalo.
“Elelo lOukwanyama ola kala li hena Ohamba okudja mo1917 eshi Ohamba Ndemufayo a fila molwoodi loita yoshihangakena yovaputu neembulu momafiku 06 Februali 1917 mOihole moAngola,” Weyulu ta ti.
Weyulu okwa holola ta ti ependafule Nujoma eshi la eta emanguluko, Ouhamba wOukwanyama owa dikwa mOmhedi, konima yeedula dihapu.
“Tatekulu Nujoma okwa kala omweenda mOuhamba wOukwanyama. Ohatu mu pandula koilonga yaye iwa oyo etu longela,” Weyulu ta ti.
Omukwaniilwa wAndola Fillemon Shuumbwa Nangolo okwa holola ta ti Nujoma kali omushuni monima unene ngeenge ovakwaita vekondjelo manguluko tava dipawa keembulu.
“Nonande ovakwaita va dipawa vahapu, Nujoma ina shuna monima. Okwaya komesho, nefano oleshi ulika nokuli ngeenge ta popi kutya okwa tokola. Luhapu okwa li ha popi ta ti eembulu ohatu di tu oshiti,” Nangolo ta ti.
Omukwaniilwa okwa tumbaleka Nujoma molwa oilonga youpendafule oyo a longela oshilongo.
Okwa holola ta ti okuna omukumo kutya Nujoma ota twikile okukala omukwamhungu muwa wovanhu vaye Ovanamibia.
Omukwaniilwa okwa ti okwe li longa shihapu kOmukokolipresidente nota ka twikila okulonga osho eli honga kuye.
Omalelo moshilongo okwa tumbaleka Nujoma shaashi a dana onghandangala mexumo komesho lomalelo opamufyuululwakalo.
Omalelo opamufyuululwakalo okwa holola kutya Nujoma okwa li a fimaneka nokuna ohokwe momalelo opamufyuululwakalo.