Auleria Wakudumo 

Opolifi moshitukulwa shaShana otai kongo omulumenhu weedula dihe shivike eshi vati a taataa ounona koufita nokukwata po kamwe keedula 13 ndele te ka kwata keenghono. 

Oshiningwanima osha ningilwa momukunda Okadila moshikandjohoololo shOngwediva, mEtine komatango. 

Eshi osha kolekwa komupedukulunhu wopolifi koshikondo shokukonaakona oimbuluma moshitukulwa shaShana Deputy Commissioner Frederick Ndjadila. 

Otaku hokololwa omufekelwa a hanga ongudu younona tava lifa oikombo. 

“Omufekelwa okwa fola oshimwati ndele ta totele ounona omanga ta ingida ta ti ‘omwa lombwelwa muha kale vali pamwe ngeenge tamu lifa,” Ndjadila ta ti. 

Ounona ova tukauka vati mokufaduka po nomufekelwa okwa landula nakuningwa oshihakanwa fiyo te mu kwata. 

“Okwa kufa mo ombele nokuninga omatilifo oku mu dipaa manga ine mu kokololela moixwa ndele te mu kwata keenghono,” Ndjadila ta ti. 

Eshi a kwata okaana keenghono, okwa twikila nokuninga omatilifo okudipaa okaana ngeenge oka popi osho ka ningilwa. 

Oshiningwanima shikwao, opolifi moshitukulwa shaShikoto otai kongo omulumenhu e shivike eshi vati a kwata keenghono okakadona keedula 20 ke na ounghundi wopamadilaadilo. 

Eshi osha ningilwa momukunda Ohadiwa moshikandjohoololo shaMulonga Etitano lwopo 22h00. 

Omupedukulunhu wopolifi koshikondo shokukonaakona oimbuluma moshitukulwa shaHangwena Melanie Mburuu okwa holola ta ti omufekelwa okwa ifana nakuningwa oshihakanwa konduda yaye yokunangala ndele te mu kwata keenghono. 

Otaku hokololwa vati omufekelwa a faduka po ashike opolifi otai twikile noku mu konga. -wakudumoauleria@gmail.com