ONGWEDIVA – Omunambelewa wehangano lokuyandja ohonde lo- NAMBTS Adolf Mwafangeyo okwa ti onghalo yohonde inai wana moipangelo paife oya xwepopala. 

Okwa ti okudja ketameko lomwedi ou ovanhu ova holoka momwaalu munene okukayandja ohonde, okufaafanifa neemwedi da pita. 

Okwa hokolola ta ti muDesemba womudo wa dja ko ehangano lavo kakwa li tali dulu okuyandja ohonde kovanaudu vahapu molwaashi kapa li ohonde ya wana. Mwafangeyo okwa ti ehangano lo-NAMBTS otali pandula oshiwana eshi shi na ohokwe yoku ka yandja ohonde komandiki a yooloka aeshe moshilongo. 

Okwa ti endiki lavo olo li li koshipangelo shaShakati ohali longo Omaandaxa keshe okudja po10h00 fiyo opo18h00 oshivike keshe. 

Okwa kumaida oshiwana opo shi twikile okuholoka momwaalu muhapu oku ka yandja ohonde molwaashi ohonde oya fimana kovanaudu. 

Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe. 

“Ohonde ei tai yandjwa koshiwana ohai kwafele ovanhu ve na omikifi da yooloka ngaashi okanghela, pefimbo oomeme tava pulumuna, omunhu ngeenge ta tandwa nosho tuu omikifi dikwao,” ta ti. 

Okwa lombwela oshiwana opo shi topolleafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde. -fhamalwa@nepc.com.na