Auleria Wakudumo
Omupresidente Netumbo Nandi-Ndaitwah oku li metalelepo lonhomenawina koishiindalongo.
Onghela okwa li koBotswana, nonena okoZambia oko ta talela po yo omapandaanda oo taa lukilwa Omukokolipresidente Sam Nujoma osho yo omupresidente omutitatu Hage Geingob moZambia.
Ombelewa yOmupresidente oya holola kutya eshi oshi li oshikando oshit ivali Nandi-Ndaitwah ta i mekwatafano naPresidente Duma Boko waBotswana osho yo nOmupresidente waZambia, Hakainde Hichilema okudja nghene a ya koshipundi mo21 Maarsa neudo.
Omupresidente ota talele po oilongo ei ivali okunghonopaleka elongelokumwe pokati kaNamibia naBotswana osho yo Zambia.
KoBotswana, Nandi-Ndaitwah okwa kundafana nOmupresidente Boko kombinga yekwatafano pokati koilongo ivali unene kwa talika keyandjo loilonga kovakwashiwana opo ku yambulwe po eliko loilongo ivali.
“Omupresidente okwa mona omhito iwa okukundafana oinima imwe ya wedwa po ngaashi okulongela nokutula oukuni kumwe opo ku yambulwe po opate yeshina lokolutenda hano oTrans- Kalahari, eengaba hadi ifanwa oMamuno, osho yo oTrans-Kunene Corridor hano opate poshivelo shaKunene,” tava holola.
Ombelewa yOmupresidente oya holola yo kutya Omupresidente waNamibia naBotswana otava ka kundafana nokutula moilonga okuninga oipindi i na kungabekwa pokati koilongo.
Omupresidente ota ka kundafana yo elongelokumwe loikwanghono yopaushitwe okuyambula po ‘oMohembo-Katima Mulilo noGaborone-Kudzanai-Katima transmission lines’.
Ombelewa yOmupresidente oya ti, Nandi-Ndaitwah ota twikile koZambia nena oko a teelewa a ka popye kepatululo lepandaanda pambelewa moLusaka.
Epandaanda olo la li hali ifanwa Kasama otali lukululwa li ninge Omukokolipresidente nakufya Sam Nujoma nepandaanda olo la li nale Sadzu otali ka lukululwa nokulukwa Omupresidente omutitatu waNamibia, nakufya Hage Geingob.
Otaku hokololwa Nujoma naGeingob aveshe va li hava di moZambia oule wefimbo pefimbo loukoloni.
Etalelepo lomupresidente koZambia otali ka nghonopaleka omakwatafano pokati koilonga.
Namibia naZambia ova kala nale ve na eudafano la kola okudja pefimbo loita.
Ombelewa yOmupresidente oya weda po kutya okudja oshilongo eshi sha manguluka, oilongo ei ivali oya longela kumwe moikondo ya yooloka ngaashi ounamapya, oikwamina, ehongo, ouhaku, omatalelepo naikwao ihapu.
“Zambia naNamibia ova shaina eudafano lopambili opo Zambia a kale e na okapale ke lifikamena po moWalvis Bay osho yo ondjila imwe oyo hai ufanwa oOne-Stop Border post (OSBP) peengaba daKatima Mulilo,” Ombelewa yOmupresidente ya holola.
Eshi oshi li oshikando shitivali omupresidente ta ka talela po kondje yoshilongo.
Nandi-Ndaitwah okwa fiya po oshilongo lwotete eshi a ya koAngola oshivike sha dja ko. Etalelepo laye koAngola ola li konyala la faafana netalelepo laBotswana naZambia.
“Etalelepo laAngola ola li tal i nghonopeke oukaume, oukwawowananghali osho yo elongelokumwe nombili oyo ya kala nale pokati kaAngola naNamibia okudja koukoloni,” Ombelewa yOmupresidente tai ti.
Omupresidente okwa teelelwa a kale a alukila moshilongo mEtitano lomafiku 16 Mei neudo.