Opolifi moshitukulwa shaShana otai konakona oshibofa shekwatonghonga omo omunafikola weedula 19 a kwatwa keenghono manga ta di kofikola.
Oshiningwanima eshi osha ningilwa pomatungo ihaa longifwa vali lwopopepi noIndongo Toyota mOngwediva, sha ningwa Etitano po13h02 lwaapo.
Omupopiliko wopolifi mOshana, Chief Inspector Thomas Aiyambo okwa koleka oshiningwanima eshi.
Otaku hokololwa omunafikola a hangika a uka keumbo eshi a shakanekwa kovalumenhu vatatu lwopoIndongo Toyota mOngwediva.
“Umwe okwa pa omunafikola enghava loshipilama omanga vavali tave mu nane noku mu ningila omatilifo nombele,” Aiyambo ta ti.
Ovafekelwa ova shilila nakuningwa oshihakanwa metungo lishunga vati ihali longo vali ndele tave mu kwata keenghono.
Otaku hokololwa vati ovalumenhu vavali va kwata nakuningwa oshihakanwa komaoko nokomulungu omanga mukwao temu kwata keenghono.
Aiyambo okwa holola yo kutya ovafekelwa ova kufa nakuningwa oshihakanwa ongodi yoLenovo Black Tablet, yongushu yoshimaliwa shi fike poN$4 000.
Aiyambo okwa holola kutya oimbuluma tai ningilwa momatungo oo ihaa longifwa vali otai ende nokuhapupala.
“Eembudi paife otadi longifa omaumbo, eengeshefa ile omatungo onhumba oo ihaa longifwa vali okulonga oimbuluma.
Eenhele odo oda ninga yo omhito iwa kuvo opo va faduke po opolifi ngeenge tava kongwa,” Aiyambo ta ti.
Aiyambo okwa indila ovakwashiwana opo va lopote kopolifi omalinyengo a limbilika ngaashi ovanhu tava di ile tave ya momatungo makulu ile oo ihaa longifwa vali.
Okwa ti oshiwana nashi kale shi li oupafi nokulopota ngeenge va mona etungo lonhumba olo ihali longo ashike ohamu uyauya ovanhu ile tava di mo shaashi otashi dulika va ninga onhele oyo onhele yokulongela oimbuluma yavo.
Aiyambo okwa holola yo kutya otai mekwatafano nomalelelo eedoolopa opo va tale oveta yomidingonoko, okatendo oko haka pitike elelo li hanaune po omatungo itaa longifwa ngeenge pa pita oule wefimbo lonhumba.
“Eshi otashi kwafele okushunifa pedu oimbuluma mokati koshiwana,” Aiyambo ta ti.
Ovafekelwa inava tulwa moipandeko natango nomakonakono opolifi otaa twikile.