Kansela woshikandjohoololo shaKongo Efraim Shipindo okwa ti moshikandjohoololo shaye omu na oikunino younamapya 34 tai kwafele oshiwana okulonga oikulya yavo vene nokulwifa oluhepo.
Okwa ti oshikandjohoololo shaye otashi xumu komesho ngeenge tashi ya poshikondo shounamapya.
Kansela okwa ti oikunino ihapu moshitukulwa, ngaashi oshikunino shi li kOmauni noshoyo oshikunino shedina Linelao, oi kwetelwe komesho kovanyasha. Shipindo okwa yelifa ta ti moikunino oha mu kunwa oikunomwa ya yooloka ngaashi eenyanga, omatama, omababana nosho tuu. Okwa ti oikunino imwe oya totwa po kepangelo omanga imwe oyo paumwene ikwetelwe komesho kovanhu vonhumba.
“Natango moshikandjohoololo shange omu na eepoloyeka dokutekula eexuxwa omo ovanyasha vahapu va pewa eemhito doilonga.
Shipindo okwa ti ngeenge owai mOkongo oto hange mo ovanhu tava landifa oikunomwa yandja moikunino.
“Ovanhu ve na eengeshefa ohava ka landa kokuinino yomOkongo ndele tava ka landifa keedoolopa da yooloka,” ta ti. Okwa ti oikunino ei otai dana onghandangala iwa okuyambula po oshikandjohoololo shavo. “Oikunino younamapya oya fimana moshilongo molwashi otai lwifa ondjala noluhepo,” ta ti.
Kansela okwa ti eefikola dimwe moshikandjohoololo shaye odi na oikunino tai longwa kovanafikola osho shi li tashi ulike efano liwa.
“Ovanafikola nava longwe kombinga yefimano lounamapya molwashi otashi vatu omukumo okutotapo oikunino yavo vene keedula dokomesho,” ta ti.