Ozombara za Kandjoze za karere pomazemburukiro wEyuva rOtjiṱiro Otjindjandja otjikando otjitenga i yohoromende pOtjikunio tjOndjuowo yOzoveta mOtjomusie Oritjatatu.

Nandarire kutja ovengi moviwaṋa nomihoko vyozombara inḓa, ngandu kouṋepo tjiva wokomiti yozombara nḓa novimbumba oviyandjaruvara kozombara aavi munu  kutja kavesere okukakara potjitjitwa tjohoromende tji posi ya Omandaha pombongareo yazo ozeni nokuhina ovikasengo vyazo, ozombara za tyere okukakara potjitjitwa tji kehi yomapu ngunda nai ngu maye tjiukwa i yozombara ozeni. 

Otjiwaṋa okutuurungira momirari pekepeke vyotungovi vyozondekurona tjiva mbiri kehi yomauhonapare wehika indi ngandu komirari vyarwe vyotungovi mbi kongorera ehika indi popezu nokuripa oruvara aavi muna kutja mena rokutja ozondekurona zOtjiṱiro Otjindjandja Ovaherero, Ovambanderu nOvakwena kavesere okuyenda komazemburukiro inga tjinga ape hi na nandarire umwe wovanane vawo poo ondekurona uri morutuu romazemburukiro nga. Pendje novimbumba vyovitjitwa vyombazu porwe tjimuna omautjina, ozondoro nozombimbi na wina omapundiro wotjikwena na vyarwe. Ku ku he ri kutja naṋi imee poo vevari vozondekurona mave pewa oruveze rokutwapo okambo. Otja korutuu ava hungirirwepo i yOmuhaamise wOtjirata tjOzombara, Immanuel /Gaseba. 

Ozondekurona nḓari morutuu indwi Operisindenda yOkehi Lucia Witbooi, eye noho ngu ha ri ama kuramenepo ozondekurona posi ya motjiṱo tje otjomunane wehi wokehi. Ohapo wina motjiṱo itji nguri omundu ohoromende koviṱuve vye ku irondisa otjiungura tjOtjiṱiro Otjindjandja motjihungiriro ku nEhi rOvandoitji nayo. Witbooi morutu wari notiungura tjembo romapatururiro uriri.

Ondekurona yarwe Omuhonge Raonga Kuzatjike eye ngwari nembo rouyapuke.  Operesidenda yEhi Netumbo Nandi-Ndeitwah a kara nehungi reyuva tjazumba Omuhaamise wOmbongarero yOtjiwaṋa, Sara Kuugongelwa-Amadhila a pata.

“Ngwe ku horora rumwe, me ku horora ovikando omayovi, kape nohepero yokunungurura okuvare okumuna kutja okururu,” omambo nga ungurisirwe momurari umwe ohunga nondyero yozombara okuyenda kotjikunino. Ngunda ape ri nao Ovambanderu vOmimbonde Vitano wina vari pOtjikunino pave tja ovitjitwa tji vya yanda owo mave sewa kombunda okukara novyawo oveni. Ngunda wina Ovaṱakume avari nomazemburukiro wawo kuwo oveni posikore indji OA. Tjipena. Tjingetjo tjimuna Otjikandjoze tji tjari pOUN Plaza okuza kOritjavari.