Nonando aanafalama yomomapya ya kala ya taalela omaupyakandhi ngaashi efundja, oshipahu, okadhila nokapuka tayi hanagula po iilya momapya omimvo dhapita, nuumvo otaya pandula oshoka oya mona eteyo ewanawa. 

Kaino Iyambo gwomomukunda Onaanda okwa ti, oyali ya sholola oshoka kehe ethimbo omapya gawo ogali taga ponokelwa kiipuka mbyoka hayi tuka mombanda, ka kwali yeshi ngele otaya thigilwa po sha. 

“Omagalikano getu ogu uvika kuTate megulu, nonando kwali twa taalela omawupyakandhi ngoka ethimbo alihe, otwa likola iilya oyindji momampya getu nuumvo,” ta ti ngaaka. 

Ta ti, inashi kala oshipu, ihe oya kambandhala mpoka taya vulu okutidha noku dhipaga iipuka mbyoka. 

Ta ti otaya pandula natango uuministeli wuunamapya mboka wa kala tawu ya yambidhidhidha okupombela iipuka mbyoka kaayi tsikile okulya iilya yawo. 

Lydia Shoolongela gwomomukunda Onaushe okwa ti, okwa tameke okuteya iilya ye oshiwike sha ziko, ihe sigo ompaka ota pandula oshoka oshipale she oshuudha nale iilya nonande ina mana okuteya. 

“Nuumvo otwa longa shili twii tula mo. Ngeno okwali iilya yetu yimwe inaayi lika po kiipuka mbyoka yali ya ponokele omapya getu, ngeno se aakengeli,” ta popi yeta yolo. 

Shoolongela okwa ti, mepya lye okuna mo ombinga yoshifukwa, shoka hakutha oofukwa taka landitha. 

Ta ti, oofukwa dhoka alanditha sigo oompaka, odhe mupe oshimaliwa N$2 000 shoka alongitha okuyambidhidha aanona ye mboka yeli koosikola. 

“Ngele nda mana okuhwa, andi kalanditha iilya yimwe ndi mone natango oshimaliwa shandje, omanga yimwe tandi yi siikilile,” ta ti ngaaka. 

Okwa ti, iilonga yomepya ohayi mweetele oshimaliwa. 

Ta ti, kehe shoka talongo mepya, oha topola yimwe oyo megumbo omanga yimwe taka landitha. 

Aune Emvula gwomomukunda Omulunga okwa ti, nonando ombinga yimwe yepya ya hanagulwa po komeya gefundja ombinga yimwe oya za iilya shili. 

“Okwali twa longa shili nuumvo, ihe iilya yimwe oya hanagulwa po kefundja. Ita tu tuku Kalunga oshoka otwa mona mo iilya kombinga yimwe yepya, yakwetu yamwe inaya likola mo sha,”ta ti ngaaka. 

Joseph Malakia okwa ti, nonando iilya ye, kayishi lela oyindji, okwa likola mo ngaa mbyoka ta vulu okulya, ihe ineyi nyanyukilwa nawa. 

-vkaapanda@nepc.com.na