Okuhina omunda otjomutjiwe nohatoi kua Jonathan Katjimune motjiposa ohuna nOmbara Otjitambi yOvaherero maku keyakeyewa.
Katjimune wa yandjere ouhatoi motjiposa itji tji tja utire mOtjombanguriro tjOkombanda mOtjomusie Omandaha Katjimune meri ohatoi . Tja yandjere ouhati wokutja omazikiro wOmbara Otjitambi Onongo Mutjinde Katjiua kanaa ya kongorera omirari mbya tuwapo otja kombazu yOvaherero eye tjeya kotjihavero mu Seninarindi mo 2022.
Ouhatoi Ohahende Reinhardt Totemeyer mbu yi hari mo nongamburiro muwo amatja Katjimune uyandja oruvara korupau rwa Vipuira Kapuuoo.
Omandaha Otjombanguriro tjOkombanda mOtjomuise otji tja utire okupuratena otjiposa tji tja hitisiwa i yOrata Onene yOuhonapare wOmbazu wOvaherero, Vipuira Kapuuo.
Eye Otjomuhaamise wOvihavero vyOtjirata Tjozombara tjOvaherero, Ochief’s Council, nu wina oruveze ndo ngwa varwa i yorupa rumwe rOvaherero otjomuṱize wotjihavero tjOmbara Otjitambi yOvaherero, Oparamount Chief, kombunda yonḓiro mo 2019 yOmbara Otjitambi, Ohahende Vekuii Rukoro, ngwa hitisa otjiposa tjokupirura kutja, omunda umwe wOtjiwaṋa tjOvaherero ingwi ngu u tja wa yarurwa motjihavero tjOmbara Otjitambi, Onongo Mutjinde Katjiua, ke ya yaruka motjihavero itjo tjinga ombongarero kangamwa ndji kuza ye mu zika motjihavero itji aya sere kutja ya isanewa nokuhaamisiwa i Kapuuo.
Mu nao otja ku Kapuuo ombongarero ndjari mOnḓerombamba mOmongua tji ya ri 10-12 ku Tjitarazu mo 2021 otji ha ri kotjiveta. Ovakongorere vOnongo Katjiua ndji ve tja ondje mu zika. Kapuuo motjiposa itji opu ma pahere kokutja Otjombanguriro tji yandje era rokutja kangamwa ozondyero nozongutiro zombongarero ndjo ze zengisiwe nokunakaurwa.
Otja kohahende ndji mai kuramenepo Kapuuo, Raymond Heathcote, Onongo Katjiua ena rotjiṱo tjOmbara Otjitambi we rimuna uri okutuurungira mokukambura komasa” otjiṱo poo otjihavero itji. Ama paṱasanisa kutja Ouhonapare wOmbazu wOvaherero, u ungura tjimuna orutu aruhe kangamwa ndwa zikamisiwa romazeva nu ku nao wokehi nokuhinombata ongwa sere okuyarukira Ombara Otjitambi moruveze monḓiro ye. Erero otjiposa itji tja kayendere komurungu.