Orupare rOngutukiro mOtjomuise muhuka maruundjirua okuura potjinyo.
Mena roviṋenge vitatu. Okaserandu otji ma itoora otjikando otjitjatatu ovikongorerasane otjikorone tjouhona tjotjimbere pondondo yokombanda mbamda mo Namibia. Oro nai ndi ma iyaruka naro rukuao nganda yeritaarere mo 2o23, no mbura ndjazuko airi ṱiza nu nai rukuao oyondjo yaaruka naro. Tjazumba noho ehore indi ndasere oku kara mEpako riri kuna Oafrican Warrior, ndjiri poruveze Orutjavari. Nohapo wina Ofrican Warrior nOkaserandu tji za hakayenene ovitenda vihuasana omureru. Otjitjatatu ehore Okaserandu ndji ma iso kutja maitike nayo imue yozonjose zayo onguru, Joshua Zoo Kambizo Tjikuzu. Nguatire eṱukuhuka ra Ritjatano nda zuko ri tjire Oroviungura. Omueze nozonyose tji ma ze karara neyuva ri pite, eye otjonyose onguri otja rarerere.
Momayuva wayo Zoo yari onyose pu nozonyose ozongwao motjira tjOzonyose za Afrika, itji Oafrican Stars. Onḓiro naa hapo i riraisa poo i rihuna. Tji ya ri 23 komueze mbwa zuko omutjange womanyando omukuru Carlos CK Kambaekua otja zemburukire omunyande ngwi mongoramambo indji Onew Era morupa romanyando me yandja ondjozikirio kovanyande ovakuru kutja ve riko poo va kapitirira. Kapeno kuhakua kutja Zoo nandarire kutja omayuva inga kaa penduka, kutja rakakarere po Legare, atja kakarapo. Poo muno otja tjavaserue muno ehore mura rundururirua. Munao kOkaserandu wina ehore indi otjeri ondjozikiro yapeke konyose yatjo indji.
Pendje no ku ninikizirua kehi yombangu yotjivara noyoumuhoko oruveze indo, “posi ya ngunda ape ri nao yari oruroto rwa kangamwa omuzandona omutanda momaturiro wOvambanderu poo wOvaherero mOruvanda mOtjomuise okuzara okambindja kotjivara otjiserandu, otjiyapa neyuru tjOafrican Stars. Momitanda mbi umwe wawo ngwari Zoo. “Wotjiyandjewa okukatuwa pehi tjokunyondorokisa otjimbere mokati kovakwao ngari nondjiviro ongumise,” CK watjangere nao.
Na tja okamburukweva ka Zoo kotjimbere kaake roro okuhukuka. Wari nongamburiro muye omuini aa hungama ovakwao morutjandja nandarire kutja tjandje ngunda okandu okaravarava uriri. Okuṱisa ovakwao vozombwiṋi ohoṋi morupare kuye yari ouṋa uriri. Zoo makasuvisiwa kEpukiro kOtjimanangombe ku ma kahayena nozonyoze ozongua ozonguru, tjimuna Jackson Kotjuuru Meroro.