Auleria Wakudumo
Ouministeli wounamapya, omeva, eeshi nomatalululo omadu owa indila ovanafaalama va kune oimeno oyo hai xupu noupu moutalala nokufila oimuna yavo oshisho pefimbo eli lokufu.
Omupopiliko wouministeli , Simon Nghipandulwa okwa holola kutya osha fimana okufila oimeno noi namwenyo oshisho pefimbo loutalala opo ovanafaalama vaha kanife oimuna noimeno yavo koutalala.
“Ovakwashiwana ova pumbwa okukuna oimeno youtalala ngaashi okeembidji, okanakamundesha, ombidi, eenyanga naikwao ya wedwa po,” Nghipandulwa ta ti.
Nghipandulwa okwa holola kutya ovanafaalama ova pumbwa okukala ve shi kutya oimeno ilipipo hai kunwa pefimbo eli loutalala opo vaha kanife oyuuyemo yavo.
Oimeno oyo ihe hole outalala ongaashi omanyoto, ogreen paper, omakunde, outanga (Squash), okukumba naikwao imwe.
Nghipandulwa okwa indila yo ovanaimuna opo va fiile oshisho oimuna yavo opo iha fye koutalala.
“Oimuna ngaashi outana, oukombwena naikwao ishona otai dulu okuningilwa okamutala kwa tulwa nande omalapi opo iha fye outalala,” Nghipandulwa ta ti.
Ovanafaalama vamwe ohava kanifa unene oimuna yavo unene pefimbo eli loutalala. Oimuna imwe inai ningilwa oshuunda nohai nangala ashike membwalangadjo.
Oimuna i li moshuunda ohai lietele oupyu eshi i li mumwe nokukeelela okufya koutalala efimbo limwe.
Omunambelewapitifi kehangano longhalo yomhepo Odile Kgobetsi okwa holola kutya outalala onghene tau twikile oshivike eshi.
Onghalo yomhepo otai tengenekwa kutya otai kala koshi yanhano koitukulwa ihapu yoshilongo ngaashi konooli omanga oitukulwa ikwao ngaashi moKhomas onghalo yomhepo ya tengenekwa tai kala ponola natango. Kgobetsi okwa holola yo kutya onghalo yomhepo otai ka lunduluka okudja nena. Onghalo yomhepo oya tengenekwa tai ka ya pombada okudja punola ya uka pumbali nanhatu oshilongo ashishe.
Efimbo longula nalo otali ka kala la pupwala okudja nena fiyo Olomakaya.
“Ashike otaku kala outalala unene efimbo lokomatango nokonguloshi unene pondingandinga yoshilongo, (mwa kwatelwa oWindhoek),” Kgobetsi ta ti.
-wakudumoauleria@gmail. com
efano: One Namibia