Auleria Wakudumo 

Omundokotola woimuna mouministeli wounamapya koshitukulwa shaHangwena, Dr Magano Kefas okwa kunghilila ovanafaalama unene ovanaimuna opo va file oshisho oimuna yavo pefimbo loutalala. 

Kefas okwa ti ovanaimuna nava nangeke alushe oimuna yavo koyuunda, okukala ya pewa oikulya ya wana nokunwa omeva ma yela opo iha kwatwe komikifi da yooloka odo hadi tukuluka poutalala. 

Moshuunda, oimuna ohai lixu mumwe nokulietela oupyu shi dulife eshi i li momumbwalangadjo. 

“Ovanaimuna otava indilwa opo va tunge oyuunda yoimuna, ihai lokwa yoo itai dulu okupita omhepo noutalala uhapu,” Kefas ta ti. 

Ovanaimuna otava indilwa yo va yale omwiidi pedu moyuunda opo oimuna iha kwatwe koutalala ou tau di medu. Kefas okwa holola kutya omikifi dimwe odo hadi holoka molwa outalala ongaashi omukifi wokomapunga oo hau eta opneumonia hano omeva komapunga. 

“Omeva komapunga ohaa etwa koutalala unene tuu pefimbo eli oshoyo ngeenge oimuna ya tulwa monhele ina odwi yoo oya finana,” Kefas ta fatulula. 

Omudokotola woimuna okwa kughilila opo ovanaimuna va twale eengobe kovenda opo diha kwatwe komukifi wopneumonia nokulanda omiti doimuna. 

Okwa ti ovanhu nava kale tava tale oupyu woimuna efimbo nefimbo opo va didilike oyo ya kwatwa koutalala noya pumbwa ekwafo. 

-wakudumoauleria@gmail.com