Auleria Wakudumo
Oshinyadhila – Nonande oulunga womamanya okeembila wali wa fa wa shuna pedu, oshinima eshi osha tutuluka po vali, nopaife otashi udika koitukulwa yayooloka moshilongo.
Oiningwanima italala yoludi eli otai holoka momuunda Oshinyadhila No1, moshitukulwa shaShana omo ovakwashiwana va holola eudo nai eshi veli twa eembila dovaholike vavo da vakwa oipambu yomamanya nokutewa kovanhu vehe shivike.
Julius Ipala, oo eli omutonateli pomaendo hai ifanwa Omakakala mOshinyadhila okwa holola kutya omaendo oo a nyonaunwa okwe lituwa komukwashiwana umwe oo kwali eya okutalela po ombila omuholike waye.
“Mokukonakona omaedo okweli twa eembila odo da longelwa oushada kookalyamupombo nokushiivifila ovanhu,” Ipala ta ti.
Julius okwa ti pefimbo oshinima eshi sha monika, ova li va mona ashike eembila nhatu odo da kufwa omamanya okominghulo, oo haa ifwa oulenda vomominghulo ashike kohainga oveke li twa eembila di dule puhamano da wedwa po odo da kufwa oulenda.
Kundana eshi a ya koshiningwanima okwa didilika kutya eembila dimwe oda wa po filufilu nomadina oonakufya okwa ya koshi yedu shaashi oulende va kufwa ko. Eembila dimwe nande da vakwa oulenda, inadi wa po natango ashike okaungulita otaka tikile pedu molwaashi oulenda va kufwa ko.
Umwe womovakwashiwana va ningilwa oshiningwanima eshi okwa holola kutya oshinima eshi oshe va udifa nai nosha eta ouyehame muhapu kuvo.
Maria Sheyanale okwa ti oshiningwanima eshi otashi va dimbulukifa efiku va kanifa ina.
“Emanya eli la hanaunwa po ola meme. Meme okwa ehama eedula di dule pu nhano omanga ina xulifa. Onda fiya po oilonga yange opo di dule okukalela meme shaashi okwali a kwatwa kounghundi wopada,” Sheyanale ta hokolola nondaka tai ngengema.
Sheyanale okwa holola kutya oshinima eshi osheva etela omalipulo mai. Okwa ti ihava tula vali omofi momesho molwa oshinima eshi. “Ohatu li pula kutya omunhu ou a longa ouxwapindi ou okwa dja peni. Ngeenge okwa dja kokule, okwa mona ngahelipi kutya momaendo umu omuna eembila doludi eli? Ile pamwe okwa longela kumwe nomukwashiwana wopu fye,” Sheyanale ta pula. Sheyanale okwa holola yo kutya emanya laina ola ya ko nale mo2017 odula ina a xulifa.
Okwa ti okwa limbililwa shaashi opena ngaho omamanya mape a faafana ashike oo inaa vakwa nande oulenda.
Sheyanale okwa ti otava kendabala okuongela oshimaliwa opo va tule ko odalate ili nawa okukeelela eembudi.
Sheyanale okwa holola yo kutya ova indila keshe eumbo li kale tali di oN$100 opo i kwafele okufuta omutonateli shaashi ou eli po iha futwa oha tale po ashike shaashi oye eli popepi nomaendo. Sheyanale okwa ti oshina okupula ovakwanedimo oshimaliwa shihapu natango opo va dule okulongulula eendo lomuholike wavo. “Oshinima eshi inashi tu udifa ashike nai ndele otashi ketu pula yoo oshimaliwa shihapu okulongulula emanya lameme. Ohatu ka tula ko emanya la yooloka kwaali la nataulwa opo tuhe keli hange tuna oudjuu wa faafana,” Sheyanale ta ti.
Mwene wehangano lokufudika hali ifanwa oTrinity Funeral Service Kalimbo Iipumbu okwa pula epangelo li kwafele oshiwana okukwashilipaleka kutya keshe pomaendo opena omutonateli ha futwa kepangelo. Kalimbo okwa ti osha fimana okufimaneka oonakufya ngaashi naanaa ovanhu va fimanekwa pefimbo veli momwenyo.
“Fye onga ovanangeshefa vomamanya okeembila, otwa kala nokufeekelwa luhapu kutya ofye hatu tumu ovanhu va kake omamanya keembila ashike hasho shili ngaho,” Iipumbu ta ti.
Iipumbu okwa holola kutya omamanya mwa kwatelwa oulenda vokomamanya ohaa dulu okukwewa nokundulukululwa moshinima shimwe vali shi hefi emanya lokombila. Okwa ti vamwe ohava nduluka po oifeweki yomomaumbo naikwao ya wedwa po. Otaku feekelwa vamwe hava longifa omamanya oonakufya okuninga oityatelelo yomeni nopoivelo yeenduda davo, pohele yoku kolonga mo.
Iipumbu okwa holola yo kutya oshinima sha tya ngaho itashi yandje efano liwa keengeshefa davo.
Kansela woshikandjohololo Oshakati East Abner Shikongo okwa ti onghundana oya halula vahapu moshikandjohololo shaye.
Okwa indila ovakwashiwana moshikandjohololo shaShakati East opo shi longele kumwe okulopota keshe ou ta monika ta landifa oulenda ile ngaho oindulukomwa tai limbilike.
“Ohatu indile oshiwana shi alukile kuKalunga nokufimaneka ovaholike vetu ovo vetu tetekela,” Shikongo ta ti.
-wakudumoauleria@gmail.com