Omupopiliko wopolifi moshitukulwa shaHangwena Warrant Andreas Nghiyolwa okwa ti oibofa youlunga weengobe oya londa unene moshitukulwa. Etivali omulumenhu weedula 41 okwa kwatwa po eshi a hangika ta shingi eengobe hamano odo ta ku fekelwa kutya okwe di vaka. 

Oshiningwanima osha ningwa komukunda Oheti efimbo lomutenya. 

Otaku hokololwa kutya omulumenhu ou okwa dopa okuyandja ouyelele kutya eengobe okwe di hanga peni. 

Natango konima yeemwedi mbali okwa lopotwa omulumenhu a kwatwa po nomutekulu waye eshi va vaka eengobe tave di dipaa, ndele tava ka landifa okapana. Otaku hokololwa kutya omulumenhu ou oku na ongeshefa yokapana. 

Opolifi oya hokolola tai ti natango oumbudi woimuna owa didilikwa tau dana onghandangala kombinga yokeengamba unene kOkongo. 

Vati ovanhu ohava ke eengobe ndele tave di shingile moAngola nokonima ohadi ka landifwa po. 

Opolifi oya hokolola tai unene tuu omikunda da dingonoka odoolopa yaEenhana oha ku vakwa oikombo ndele tai kandifwa po okapana. 

Opolifi oya kumaida oshiwana opo shi longele kumwe okukondjifa oumbudi woimuna momidingonoko davo. fhamalwa@nepc.com.na