Ihe ya Seretse Khama, ngwari operesindenda ondenga Otjauana tjaari kutuka mo 1960, Tshekedi Khama, wina wa pwire okurukirwa komurari mOnamibia otjondjozikiro kuye kohambwarakaṋa ndja kara nayo okuvatera Ovaherero okuhandjaura nokutjiukisa ongondjero yokupirura ohuurire yEhi rOvandoitji nokukotora ehi rayo Ovandoitji ndi va punda. 

Oumune nombepo ndji ya pendurwa i yomakutjururiro wotjivandeke komurari imbwi Ofeld mOtjomuise otjivike tji tja zuko, owo nai mbwa rukirwa ku Seretse Khama. Eye ngu ma tjiukirwa koupandi we otjOperesindenda ya Tjauana oruveze oruzeu morukondwa rwa Afrika kOmanene wEhi. Oruveze omahi omararanganda na South West Afrika tji ya ri kehi yotjitandi tjotjihoromende tjombangu yotjivara tja South Afrika mena roruvara omahi nga, rimwe rawo ndaari Otjauana tji ya ri kehi yotjitandi mena roruvara nohauzeu ngaaye yandja kovira mbi rwira ongutukiro mOsouth West Afrika na South Afrika. 

Tshekedi u tjiukirwa kokuungura ku novanane tjimuna Ombara Otjitambi yOvaherero, Hosea Kuṱako.

Omakutjururiro wonguyu komurari mbwi ya tjitirwe oruveze rombongarero yokombunda yozombura mbari pokati ka Namibia na Tjauana yokutunduuza omaunguriro wakumwe. Nu puwo wina otji pa karere Operesindenda ya Tjauana, Gideon Duma Boko, nomuatje we Ian Khama, wina ngwari Operesindenda ya Tjauana komurungu wa Festus Mogae.

“Ovandu va Namibia tji va hangaurirwe i yOtjiṱiro Otjindjandja i yovimbumba vyokuriyeura vyohoromende yohuurire yEhi rOvandoitji, Otjauana tje tu pa omawameno, neṱe matu tji vara tjinene,” Operesindenda ya Namibia Netumbo Nandi-Ndeitwah wa tjere nao. Ngunda Boko tjingetjo aa varere ovirumatwa vyapamwe ovyo mbya yeta omarukururiro womurari mbwi. 

Komutwe wondanga komarukururiro womurari Ombara Onene yOvaherero, Tjinaaṋi Maharero, ouhonapare we harukuru u nondando youyenda kOtjauana okukatja ndoondoo kozombara zehi ndo kokuyandja omawameno ku honini we Samuel Maharero notjiwaṋa tje.