Ohapo Oritjatatu motjitamba tjokurinana nokuzeya orutu nomuinyo nu tjinene mokati komitanda eyuva ndi tjiukwa “otjeyuva rovasukona”.
Tjimuna Oritjaine nao motjitamba tjongamburiro tji ri tjiukwa otjeyuva orovakazendu poo ozoserekaze. Tjingetjo motjitamba tjomuzaro, Oritjatatu nda zuko otjorupa rotjiveke tjomuzaro tji tji kara ko ombura aihe kehi yonganda yomahakayenisiro okutuurungira mozongoze ozoondjozewa, Omobile telecomunnications, ousupi OMTC, Oritjatatu nda zuko, otjorupa rotjiveke atjihe tjomaraisiro womizaro pekepeke, omuzaro wombazu wOvaherero poo Ovambanderu, tjinenenene ombanda ndji yovakazendu, ohorokokweva, oku kwa yandjerwe ombango. Otjorupa rotjiveke tjomuzaro itji tjOMTC, ombura ndja zuko eyuva rimwe tjingee indi rombura ndi tji rari orapeke kuro orini kohorokweva yOvaherero nOvambanderu, ndja zuko rari orombanda yovakazendu yOvaṱakume. Tjeri otjitjitwa tji tja pendura ombango nomutongatima ohunga nombanda ndji movahungire vOtjiṱakume.
Okurinyaa ku pendura onguze, ongombe imwe i yomborora ozongwawo nondje tji mo tara otjikando tji ya ṱunwa komutjira. OMTC tji ya tandere kutja ombura ndji eyuva rimwe oromuzaro wombazu yOvambanderu nOvaherero, kanaa ya ire kware kaparukaze nai tara mozonganda nḓe tunduuza ovitjitwa pekepeke, inḓa Oppruce yoo Nanguei Tjimbundu Kangueehi na Tjuna Daringo, na indjo Oelite Pioneers, ovo mbe nomize vyOvambanderu nOvaherero ngandu kombazu yawo.
Eyuva re yere ra kapita. Yari ongahukiro nangwari kokutja ovandu ve nondjara nonyota novitjitwa vyombazu. Kakutja nai ondjira komurungu ya kangwa nokukewa kutja itji atji ha rire kutja tjari otjikando tjimwe ombura ndji uriri nungwari tji kare ko ombura aihe. Kuwo wina kwerikwambere ovasembamise votjitjitwa tjombura aihe tjombazu tji tji kara pOmbu. Kakutja nambano ombazu ya tye okuhangatenwa.
Tjimbundu-Kangueehi ma tja otjotjiṋa ombura indji tji the yere ousupi kuwo vari nozohaviho noungundipare mbu vari nawo okutjitwa pondondo ndja tja ve zera. Posi ya ondwi ya kunwa nu iho tjitenga ve noviṋa mbi ve rihongere ko kutja tjarwe, kutja ombura ndji mai yende, tji ronde ondondo yarwe yokombanda yaupamba.
Movingi ovandu mba ri po mbi mave munu kutja vya sere okuṱunwa omakondero wombanda yOtjiherero yovakazendu kutja ai ha munine orondu oyo kai na ya munisire ngwe i zara. Tjarwe omuano womeritjindiro nomakawondjero muyo. Tjimwe ongurova indjo yari tjimuna kutja omukazendu omukupwa u wondjozewa i yovakazendu wina omukazendu omuhepundu.