Ovambanderu mOtjauana mave vanga kutja Otjimbanderu ririre rimwe reraka ndi mari ungurisiwa kotjiveta momahakayeneno mehi ndo. Itji itjimwe tjoviṋa Ovambanderu ku va hungiririreko pombongarero yawo onene ndja yetere pamwe Ovambanderu avehe mouparanga wa Tjauana pamwe omayuva womasuviro nga zuko mOnduezuondjeo, tji tjiri Ogantsi morukondwa rwa Ngami. Ovambanderu tji va woronganene okuripaha nokutaviza korukapitaveze ku va ziriire, ovirumatwa vyavo nonduri yawo. Pongurameno yawo ndji yena: “Otjiwaneno tjOvambanderu mOtjauana” pu pa ri Oministera Ombatere yOzongomainde nOvitjitwa Vyombazu, Ignitius Moswaane, ku va yandjere ko onguta yoviṋenge vyombwiro yavo mu mu novyeraka rawo Otjimbanderu. Ngwe ve pere omasa okukara nomutongatima novirumatwa vyawo ovihuze nokuwana mokuurika nokunanena komurungu otuhepo kutja ohoromende i yenene okutuzemburuka movitjitwa vyayo. 

Komurungu Moswaane wa pambarere ohepero yokuṱiza, okutjanga nokukapitisa ombazu okuza korutanga nga korutanga kutja i kare ko. Na pata ama raisa omaturururiro wongunḓeveta otjotjiṋa ohepero koviwaṋa avihe okuzuvakisa eraka ravyo. Na tanga Ovambanderu kouvanḓe wawo; ombwaneno nomuano omutunge nomupore wokuraisa ozongendo zawo kohoromende. Muzo mu mu na mbi ṱuna kongaro yawo mehupo na mombwiko mouye mbu runduruka ohakahana okuṱuna tjimuna komaṱiziro wombazu; omakuramenenepo nomekurisiro. 

Omuhungirirepo wOvambanderu mOtjauana, Venjomoka Ndjarakaṋa, ma tja ombongarero ndji wina ya ri amai tara komutjangahingo weraka rOtjimbanderu; ozoratiyo nomazemburukiro wovimbumba vyombazu. Na tja Ovambanderu mOtjauana va rimbara mozondendera za Ghanzi, Charleshilla; Tsabonga, Ngamilanda, Boteti, Lentsweletau, Pilane and Mahalapye. Embo ehongonekwa rombongarero ra ri: Ongengezero okati Koviwonga: Onḓoneno yEraka rOtjimbanderu.

Ombuze ndji ya zu mozomburo pekepeke tjimuna ozongoramambo za Tjauana mu mu nOdaily News nOikereng News nOghanzi District Council.