Auleria Wakudumo
Ouministeli wouhaku nonghalonawa owa didilika etukuluko lomukifi wocholera oo wa didilikwa moshipangelo shepangelo shaGrootfontein moshitukulwa shaTjozondjupa.
Minista wouhaku, Dr Esperance Luvindao okwa holola kutya okwa shivifilwa koshipangelo shaGrootfontein momafiku 18 Novemba kutya otava fekele umwe womovanaudu va etwa koshipangelo e na omadidiliko omukifi wocholera.
Omunaudu okwa ningilwa omakonaakono oo a tuminwa koNamibia Institute of Pathology (NIP) nokwa holola kutya oku na obakiteli yoVibrio cholera oyo hai eta omukifi wocholera.
“Ovanhu vahamano ova didilikwa ve na omukifi wocholera. Ovanhu aveshe ovo va didilikwa nokumonikwa omukifi ou ohava di molukanda laGrootfontein na kave na ondjokonona yokutalela po eenhele dimwe ngeno osho tashi holola kutya omukifi owa tandavela ashike moGrootfontein,” minista ta holola ngaho. She likolelela komilandu dehangano louhaku mounyuni hano oWorld Health Organisation (WHO) osho yo ouministeli wouhaku, ngeenge okwa didilikwa omunhu umwe a kwa wa komukifi ou, nena ohaku pitifwa etukuluko lomukifi ou mokati koshiwana nomilandu da yooloka ohadi tulwa peenhele okukelela etandavelo lawo.
“Onghene onda hala ndi shivife etukuko lomukifi ou modoolopa yaGrootfontein. Ohandi indile oshiwana shiha mbadapale molwomukifiou. Omukifiwocholera ohau dulu okupangwa ngeenge oshiwana oshe liufa keemango,” Luvindao ta holola ngaho.
Omukifi wocholera ohau etwa pakulya oikulya ile omeva e na ombakiteli yoVibrio cholera. Omadidiliko omukifi ou ongaashi oshimela shomeva, onghungo osho hashi eta ekanifo leenghono momunhu.
Ombakiteli yoVibrio cholera ohai kala monyata yomunhu oule womafiku okudja pulimwe fiyo 10, nohai dulu okutandavela okudja opo. Ngeenge ocholera oya kala inai pangwa omunhu oha dulu okukanifa eenghono osho tashi dulu okweeta efyo. Ashike nande ongaho, ngeenge omunhu okwa endelelwa po, oha dulu okupangwa nokuveluka. “Onda hala okukwashilipaleka oshiwana kutya ovanambelewa vouhaku ove lilongekida okweendelela po omukifi ou opo uha tandavele noshilongo ashishe.
Eshi oshi li oshikando oshitivali omukifi wocholera tau tukuluka moNamibia.
-wakudumoauleria@gmail.com