Aantu ye vulithe po500 oya hulitha, ye li 4 846 oya mono iiponga momakandomo goohauto ge li 2 960, mbyoka ya ningwa nuumvo okuza momasiku gotango gaJanuali sigo 26 Novomba. Uuyelele mboka owa pitithwa kehangano lyoMotor Vehicle Accidents (MVA) Fund. Moshiponga oshitalala osha ningwa ongula yEtiyali, sho aantu ye li yatano ya hulithile poshiponga shoka sha holoka pomukunda Uuhama momundhingoloko Onyaanya moshitopolwa shaShikoto. 

Omupopiliko gopolisi moshitopolwa shaShikoto Inspekta Ellen Nehale-Kangulu okwa koleke kutya ombetsa yoQuantum oya idhenge omutse nomutse nohauto yoMazda 7-seater. Okwa lopotwa kutya aantu ayehe yatano ya hulithile poshiponga, oya zi mohauto yoMazda, naamboka ya ehamekwa oya li ya falwa kiipangelo. 

Ehangano lyo-MVA Fund olya ti, olya ndhindhilike kutya iiponga oyindji yomwaambyoka ya holoka, oya etwa kaantu itaaya gwanitha po ooveta dhomoondjila. 

Ya gwedha po kutya yamwe yomiihakanwa aayendi yokolupadhi mboka ya lyatwa kiihauto. 

“Thimbo limwe aantu yamwe oto adha taya taaguluka oopate inaaya tala koombinga adhihe. Ano iiponga oyindji otayi etithwa wo komayihumbato gaantu,” Nehale-Kangulu ta ti ngaaka. 

Taya gwedha po kutya, oya ndhindhilike kutya aahingi yamwe oto adha ya londeka iiti mohauto yiitenda, ihe kombanda hoka oku na aantu ya londa ko, shoka sha nika oshiponga. 

“Oto adha aahingi yamwe natango taya londoke aantu omanga ohauto kopate inaayi za ko nawa, shoka tashi vulu natango oku eta iiponga,’’ taya ti ngaaka. 

Oshigwana otashi kumagidhwa shi simaneke omandhindhiliko agehe gomoopate, okuyanda iiponga yi holeke osho wo okukanitha oomwenyo dhaantu. 

Oya kumagidha wo natango oshigwana shi kale tashi dhenge konomola 9682 uuna sha tsakaneke oshiponga. 

Taya ti, onomola ndjoka oyo nayi kale tayi dhengelwa uuna oshiponga sha holoka moondjila, opo ku gandjwe omayakulo gomeendelelo. 

Opolisi yaNamibia okupitila miikundaneki ya yooloka oya kumagidha wo aahingi yiihauto, ya hinge nuukeka osho wo okugwanitha po oompango dhomoopate. 

-vkaapanda@nepc.com.na