Taimi Haihambo 

Minista womayambulepo eedoolopa nomikunda James Sankwasa okwa kaleka manga enangeko lookansela novaleli veedoolopa ovo va findana po omahoololo oshivike sha dja ko. 

Momukanda wa pitifwa kuminista, enangeko lookansela osho yo ovaleli vedoolopa okwa li li na okukala ko nena momafiku 3 Desemba, ashike molwoyiimbo ya yooloka okwa undulilwa komesho. 

“Omanangeko itaa ka ka kala ko vali nena, nefiku eli omanangeko a tengenekwa a ka kale ko opo ta i ka shivifwa,” Minista ta holola ngaho. 

Namibia okwa li a ninga omahoololo ookansela nomalelo opaedoolopa oshivike sha dja ko mo 26 Novemba, omo Ovanamibia keembinga adishe doshilongo vali va kufa ombinga okuhoolola ovaleli vavo moikandjohoololo yavo. 

Oidjemo eshi ya dja mo, otai ulike Swapo a findana po omahoololo, koitukulwa needoolopa dihapu, shi dulife eengudu dopolitika dikwao ngaashi ongudu yoIndependent Patriots for Change (IPC), Affirmative Repositining (AR), Popular Democratic Movement (PDM) nadikwao da wedwa po. 

Ovakufimbinga momahoololo, vahapu ovava va li mo nale, va kala tava lele oikandjohoololo, osho yo omalelo eedolopa omo vamwe vomuvo natango ova shuna koipundi, konima eshi va hoololwa oikando itivali noititatu kovakalimo vomoikandjohoololo yavo. 

Ookansela osho yo oomayola veedolopa edi, ngeenge va nangekwa pambelwa, ova teelelika va ka hovele oilonga meendelelo. 

Ava va kala tava lele oikandjohoololo ile eedoolopa, ndele inava dula oku shi endifa nawa momahoololo, ova pakela nale oinima yavo, vo va palele elelo lipe ondjila, li dule okulela. 

-taimihaihambo2000@gmail.com