Omuyandjambo rozonḓera zorupa rwovita rwomeyuru, Abed Hafeni Hihepa, Ombara Edward Uapundua Mumbuu, novayaruke Kaezuu Tjijombo na Tjiriamakaja Mburura nambano ve nomivanda motjihuro tja Puuo.

Tjinga omivanda vine motjihuro tji avya rukurirwe kuwo Oritjatatu rotjtivike tji tja zuko. “Otjotjiwaṋa omarukiro womivanda mbi maye raisa ouṱoni ounene. 

Ovarumendu imba vari norupa kena rotjihuro tjetu, komapwikiro wozombazu, nokutunduuza ozondekurona zandino noruyaveze,” Omuṱize wOtjihuro Kasipo Kakondo ma tja. Na raisa otjitjitwa tji otjotjisemba notjinamakuruhungi momakuruhungi wotjihuro. Ama tja ozongunḓe za Puuo, oumbambairi watjo na ku matji zire mavi zire kware pendje na movarumendu mba. 

Otja konganda yozombuze ya Namibia indji Onampa omihoko vyovayaruke Tjijombo na Mburura va yakurire ondjozikiro indji ndja yandjwa kovoyawo mave zeri kokutja mave zemburukwa ombura aihe. Ngunda Kakondo wina aa raisa kokutja ihi otjitjitwa otjihuro tji matji sokukara nomutongatima natjo nape omihoko vaimba mba pewa ondjozikiro indji kouharupu wawo okuyandjera otjihuro okuvepa ondjozikiro ndji tje ve pe mena rovihando vyawo mbi va syeko nokusyemo motjihuro. 

Ama zeri kokutja mave yandja otjihorera komitanda okukongorera ozondando zawo ozombwa, okuungurira otjiwaṋa nondjozikiro nokukara nozongondjero nḓe hi na ondjandero okuwomborora otjiwaṋa nehi. 

Omuhaamise wOvihavero vyokomiti ombitise yoviungura vyongomainde ya Puuo, Karee Mupia, ma toko ovature okuya nozombepo varwe mba pwirire ondjozikiro tjingeyo mu kangamwa otjitamba.