ONGWEDIVA – Ovakwashiwana vamwe koshitunda shUukolonkadhi otava nyenyeta kutya kashi li pawuyuuki kombinga yoshikumungu shaMalakiya Shoombe oo a pitikwa a ninge elenga linene tali wilike oshitunda shavo. 

Ova nyenyeta tava ti Johannes Asino oye a hoololwa kunakufya Elenga Daniel Shooya oo kwa li elenga lakula lUukolonkadhi opo a ninge omuleli woshitunda shaUukolonkadhi.

Tava ti Shoombe okwa kala ashike ta kwafele mombelewa okudja omudo 2020 molwaashi Shooya okwa li e li meedula doukulupe, ye vali vati okwa li a nyika ounghundi. Shoombe naAsino aveshe ovatekulu vanakufya ElengaS hooya.

Minista weedoolopa namayambulepo okomikunda James Sankwasa okwa yandja omukanda kelelo lUukolonkadhi neudo momafiku 9 Januali tau ti kutya okwa dimina pambelewa opo Shoombe a ninge elenga linene tali wilike oshitunda osho tuu osho.

Okwa shanga ta ti elelo lUukolonkadhi ola pumbwa oku mu shivifila efiku tava ka nangeka pambelewa Shoombe opo minista a dule okufika koshivilo eshi.

Sankwasa okwa dimina kutya omukanda owa dja kombelewa yaye.

Ovanhu vamwe vomoshitunda shUukolonkadhi otava nyenyeta tava ti Minista Sakwasa ina longifa ouyuuki okuninga etokolo eli okupitika Shoombe a pewe oshinakuwanifa shokulela.

Eshi a kwatafana naKundana onghela, Sankwasa okwa fatulula ta ti omudo wa dja ko omwedi Sepetemba okwa ninga omutumba wa li kOutapi omo kwa li a ufana Chief Ndilimani Iipumbu, Omukwaanilwa Shuumbwa Nangolo, omalenga a dja mUukolonkadhi mwa kwatelwa Malakiya Shoombe naJohannes Asino osho yo vamwe va dja mepata lavo.

“Pefimbo lomutumba onda pula omapulo ndele handi pwilikine keembinga a dishe nawa nawa. Ovanhu okwa li va mona omhito yokupopya nokupwilikina vakwao,” ta ti. Sankwasa okwa ti she likwatela kouyelele wa yandjwa momutumba okwa pwilikina keembinga adishe ndele ta mono kutya mboli Shoombe oye ta kufa po oshinakuwanifa shokulela oshitunda osho. “Inandi longifa oulingilingi ame. Omutumba okwa li wa ningwa pauyuuki novanhu vahapu okwa li tava popi kutya Shoombe oye na ninge omuleli woshitunda shUukolonkadhi,” ta ti. 

Minista okwa yelifa ta ti okwa landula omilandu odo da tulwa po di na outendo vokuwilika omalelo opamifyuululwakalo.

Johannes Asino ou a a hoololwa kunakufya Shooya, okwa hokolola ta ti omudo 2008 okwa ufanwa keumbo laxekulu Shooya.

“Tatekulu okwa lombwela nge kutya ngeenge okwa xulifa aame handi kufa po oshinakuwanifa shaye shokuninga elenga lakula lelelo letu,” ta ti.

Asino okwa ti efiku olo okwa ka tala Shoombe ndele tu mu eta keumbo laxekulu Shooya opo a pwilikine eshi sha tongwa ndele ta dimine kutya onda hoololwa.

“Ovanhu vahapu ove shi shi kutya edina lange olo la shangifwa momambo kutatekulu ndi kufe po oshinakuwanifa shaye,” ta ti.

Okwa weda po ta ti ope na nomambo oo a fiwa po kuChief Shooya a shangwa edina laye a kufe a ninge omuleli woshitunda shavo.

Asino okwa yelifa osho shi li Shoombe okwa kala ta kwafele ashike shaashi tatekulu Shooya okwa li a kulupa ye okwa li a nyika ounghundi.

“Kandi udite ombili koshikumungu eshi nda pewa oshinakuwanifa kutatekulu pefimbo e li momwenyo ashike paife Shoombe ota kondjele okuwilika ye kakwa li a hoololwa nonande kwa li ta kwafele mombelewa,” ta ti. Asino okwa ti opena e yooloko pokati komunhu a hoololwa a pewe oshinakuwanifa nomunhu a ta kwafele. Shoombe onghela okwa po ta ti ye keshi ngeenge ope na edina lomunhu kwa li la hoololwa ku Chief Shooya a kufe po oshinakuwanifa shaye.

“Ondi shi hi ashike kutya aame nda tulwa po kutatekulu ndi kala handi kwafele mombelewa yaye. Inandi hala okupopya oinima ihapu shaashi natango ohatu ka ninga omutumba,” ta ti.

Pefimbo ta pulwa omapulo komutoolinghundana, Shoombe okwa anya okunyamukula omapulo.

Omunashipundi welelo lUukolonkadhi nokwa longa efimbo lile, Andreas Amunyela okwa koleka ta ti oshoshili Asion oye a hoololwa kutatekulu Shooya.

“Okudja omudo 1996 Chief Shooya okwa kala alushe ha popi kutya Asino oye ta kufa po oshinakuwanifa shaye,” ta ti.

Okwa ti osha fimana opo Asino a kufe po oshinakuwanifa osho a pewa kuxekulu.

Amunyela okwa ti Omaandaxa, pamwe nomalenga makwao ova ufanwa ku Shoombe kombelewa yelelo ndele tava va lombwele kutya opena omukanda wa dja kuminista tau ti kutya okwa pitikwa a ninge omuwiliki woshitunda shUukolonkadhi.

Natango, umwe ou a kala omunashipundi wokomitiyee kepata laShooya, okwa ti oshoshi li Asino oye a hoololwa nale a ninge omuwiliki woshitunda shUukolonkadhi.

“Shoombe naye mwene oku shi shi kuya Asino okwa hoololwa nale pefimbo tatekulu e li momwenyo. Shoombe na popye oshili. Paife koshipundi ota kondjele ko ashike okwa kala ta kwafele ndele itashi ti kutya oye a hoololwa,” ta ti.

-fhamalwa@nepc.com.na