Omuprimaminista Elijah Ngurare Omaandaha okwa talelwa po komukalelipo gwaIndonesia moNamibia, Mirza Nurhidayat osho wo komukalelipo gwaEgypt moNamibia, Ramia Shawky, okunkondopaleka uukumwe wawo oshowo okukundathana nkene ye na okukoka omaliko giilongo yawo nokuhwepopaleka onkalo. 

Sha ikolelela komushangwa gwa pitithwa kombelewa yomuprimaminista, aakalelipo mboka oya li ya tsakanene okukundathana nkene ye na okuhwepopaleka oonkalo okupitila muunafalama, oonzo dhopaushitwe, uuhaku, uuyuki nosho tuu. 

“Aakalelipo yiilongo mbyoka Namibia, Indonesia osho wo Egypt oya kundathana nokudhimbulukithathana uukumwe wa kola wu li pokati kawo osho wo ondjokonona yawo sigo oompaka ya thikama nena,” omushangwa gwa leshwa ngaaka. 

Omwa nyolwa kutya, oya thindi wo omuthindo nkene ye na oku shi enda okupitila meuvathanotsokumwe ya nkondopaleke Omaandaha, opo ya kandule po omaupyakadhi ga taalela iilongo mbyoka. 

Natango oya uvathana wo nkene taya kandula po omaupyakadhi ga taalela iilonga nokweeta po omauwanawa agehe taga pumbiwa kaakalimo yomiilongo moka. 

“Oya kundathana ooprograma ndhoka tadhi kandula po omaupyakadhi gokwaa na iilonga noluhepo, uupyakadhi mboka unene wa taalela iilongo ayihe itatu,” ya shanga ngaaka. 

Omumvo gwa zi ko, Namibia okwa li natango a nkondopaleke uukumwe wawo naMozambique. 

Ombelewa yomupresidente oya li ya nyola kutya, omitse dhiilongo Namibia naMozambique oya li ya popi kutya, omolwomahooli nomuku ndhoka dha monika moNamibia, otaya ka longela kumwe okutula miilonga shoka tashi ka longithwa nokweetwa po yi ye miilonga, ihe hamolwa omauwanawa giilongo mbyoka ashike ihe omolwomauwanawa giilongo yilwe iikwawo. 

Ongiilongo ya tseyikila okufula okawe, oya kundathana wo nkene yi na okulongela kumwe okuhwepopaleka ongushu yokawe miilongo ayihe iyali. 

“Okwa kumagidhwa oominista osho wo aakuluntuwiliki yiikwamina miilongo ayihe iyali opo ya tsakanene nokukundathana shoka sha tokolwa koopresidente,” ya ti ngaaka. 

-vkaapanda@nepc.com