Ehangano lyokwaandjaneka omalusheno miitopolwa yokonooli (Nored) olya kumagidha oshigwana shi kale tashi lopota uuna ku na ondhime yo mbaadhilila.
Omupopiliko gwaNored Lucas Simon, okwa fatulula kutya oya kala nokulopotelwa olusheno halu gu ko miitopolwa yokonooli uuna omvula nombepo ya holoka, ihe ethimbo limwe ihaya kala yena ya lopotelwa sha.
“Ope na ethimbo limwe olusheno halu gu ko ombaadhilila omolwomatempelo ga yooloka, onkene ngele twa lopotelwa ohatu kambadhala okulonga olusheno ndoka lu teme natango,” ta fatulula ngaaka.
Simon okwa ti, uuna olusheno talu dhimwa, ohaya gandja etumwalaka moshigwana omanga ku na omasiku14, kutya omahala gontumba otaga ka kala ga dhima mesiku lyontumba osho wo uule wethimbo.
Ta yelitha kutya ngele inaya tseyithilwa, ihaya kala ye shi mpoka pe na ondhime, onkene osha simana okulopotelwa.
“Ethimbo lyomvula ewinayi oshoka ohatu kala twa taalela uupyakadhi wondhime, oshoka ombepo nomvula ohayi piyaganeke omulilo golusheno,
Otatu kala aluhe tatu kambadhala okulonga meendelelo opo tu shune ko olusheno uuna lwa piyaganekwa, omolwetempelo okugwanitha po omayakulo gookasitoma dhetu,’’ Simon ta popi ngaaka.
Simon okwa thindi omuthindo kutya, uuna olusheno lwa gwa ko uusiku, ohaya tegelele kuyele opo ya vule okulonga nawa, oshoka ethimbo limwe ohashi kala oshidhigu okuthika osho wo okulonga omanga kwa luudha, nenge uuna oopaala dhi li momeya.
Okwa kumagidha oshigwana uuna shi li mondhime shi dhenge konomola 083 282 2123 nenge ya tume okatumwalaka 81673
Aron Indombo gwomomukunda Okaku kaNangula okwa nyenyeta kutya olusheno lwaNored ohalu gu ko olundji.
“Thimbo limwe inaku enda ombepo nenge omvula, tse ihatu tseyithilwa kutya otalu ka ya, ohashi tu uvitha nayi noonkondo, nolundji ohatu lala inaatu lya, oshoka itatu vulu okuteleka,” ta nyenyeta ngaaka.
Ta indile kutya naya lundulule, oshoka otaya ka kanitha iilongithomwa yawo yokomalusheno, osho wo iikulya mbyoka hayi tulwa mookila.
Maria Negonga gomomukunda Ekamba okwa ti, olusheno lwoNored ohalu ya yematitha.
“Ano oshike halu gu ko ashike ngele kwa ende ombepo? Naya longe oopaala dhawo nawa dhi kale itaadhi gu we,” ta nyenyeta ngaaka.
Ta ti, iikulya yawo haya tula mookila ohayi ningi nayi uuna ku na ondhime.
-vkaapanda@nepc.com.na
