Ozondjuwo kanaa ze rire ombiriha ndoovazu kape nehi rombiriha nu imbi oviṋa aviyevari mbi kayenda pamwe.

Oministera yOmekurisiro wOvihuro nOkozombanda James Sankwasa ma tja. Omandaha wa patururire ombongarero ohonge yozorata zotukondwa nozongomainde nḓa toororerwe oupe na wina oviuru vyomananeno wotukondwa novaungure okuza kOzambezi, Okavango koutjiro na koutokero nOhangwena Omandaha mOmbuenge okutjiukisa omananeno kuwo. Na tja ngunda eye omanana oministeri indji omahi wozongomainde mouparanga wehi kaye nokurandisiwa pozovandisa, ONAMPA ya tjanga nao. Ondando yombongarero ohonge ndji yari okutunga omayeneneno nomasorero  wovanarupa muyo  kutja otutu mu ve ungurira tu yenene okuungura ousopoke nokuyandja noupwe imbi mbi hepwa i yoviwaṋa vyato. Puyo ozorata ozombe za tjiukisirwe  koviṋenge ondomba vyomananeno pondondo yozongomainde nokuzepangiṋa neho etwe noupandi mounane. 

Sankwasa ma tja morukapitaveze omahandurisiro wehi ya rurupara Ovanamibia ozondjuwo zotjivarero tji tja yenene na zemburukisa ovaungure imba kutja okukara nehi ondari rimwe rwomapu Ovanamibia ndu va rwira ongutukiro. Komaheya wokutja ehi ri randa kotjimariva otja kondyero yomotjitamba oruveze rwoharive indo Sankwasa wa purire ku tja: Otjitamba tjiṋe ove ku mo isire? Ove omuini otjotjirata ehi ndi we rimuna? Ehi orohoromende nungwari ri nanwa i youmauhonapare wozongomainde. Pe nondengu ndji tyewa i yohoromende.” 

Momuinyo tjingewo ma tja okurarakana ehi nga ku yande, ama raisa kokutja ovanane voporotika nu tjinene mozongomainde, ombe hara outukondi wehi nokuhina okuuranda. Na weza kutja omararakaneno wehi okuranda ehi ndi hi ya kurisiwa nondando yokumuna motjimariva otjingi  moruyaveze onḓengu yaro tji ya yeruruka ku ku heri okurirandera omaungurisiro wawo oruveze ndu mo ri randa. “Ongaro ndji opendje noveta mOnamibia,” ma tja na weza kutja Oministeri ye ya tanda okuvarura ehi oupapi nouparanga okutara oro uṋe nu ve rimuna vi.

Ngunda ape ri nao Orivatjari John Muyamba wa tjangere mOnew Era kutja Sankwasa potjitjitwa tjingetjo wa hungamene ozorata nḓe nozondjo zozongomainde ozo mu ve ri ozorata.  Na tja ongaro ndji i yandja otjihorera otjivi kovature. “Ndoovazu ko sutu, mo sokuundjira ko vi ovature okusuta?” Na tja eye wa ningira ozongomainde okumuhindira omana yozorata azehe nḓe nozondjo. Ozongomainde ine uriri onḓa tjita nao. Posi ya eye ma kayenda komurungu okupaha omana wazo ombura ndji na ungura omuano mbu ma ungura nozorata zozondjo inḓa.  –Nampa