Auleria Wakudumo 

Ehangano loNamibia Revenue Agency nedina la shiivika nawa Namra ola tungulula okapale kofikola yoEros Primary moWindhoek pamufika wopashinanena. 

Omupeduminista mouministeli wehongo, oungoba, omaudano novanyasha Dino Balloti pamwe nOmukulunhuwiliki waNamra Sam Shivute ovo va patulula okapale aka pambelewa nokuyandja okapale kofikola Etitatu. 

Pefimbo ta patulula okapale aka pambelewa, omupeduminista okwa holola olupandu kehangano laNamra eshi la kwafela okutunga okapale komaudano ovanafikola. 

Minista okwa indila omahangano epangelo osho yo omahangano opaumwene opo a twikile okukwafa ounona moNamibia opo va twikile ehongo. 

“Natu tale ounona aveshe ngaashi ounona vetu vene. Ope na ovanhu ovo ve li komaumbo va hala okutwikila ofikola ashike itava dulu molwomaimbo onhumba nongadi. Natu kendabale okukwafa yo ovo ve li momhumbwe,” Balloti ta holola ngaho. 

Omukulunhuwiliki waNamra Sam Shivute pamwe nomukulunhufikola woEros Primary Jacobina Hamata ovo va patulula oudano wotete mokapale kape. Shivute oo a li a djala okambidja komudani dingi mokapale (osenda) okwa hafela pamwe novahongwa osho yo ovanambelewa okudja kombelewa yaye ovo va li tava imbi nokudaanisa pamwe novahongwa vaEros. 

Shivute okwa holola kutya Namra ina yandja ashike okapale ndele okwa yandja yo onhele oyo ovahongwa tava dulu okulihonga pehe na makamba asha. 

Ovahongwa paife otava dulu okulideulila mokapale kena oikwafifo aishe ya wana po. Mokapale omo tuu omo paife otava dulu va kale vena omafiyanepo neefikola dikwao nokuifana ovadali va tale ovana eshi tava dana omanga veli omutumba koipundi. 

Minista okwa holola kutya ekwafo eli otali kwafele okudeula ounona manga vashona opo va kale va pyokoka monakudiwa. 

-awakudumo@nepc.com.na