Auleria Wakudumo
Ouministeli womidingonoko, eefuka, nomapashiono owa holola kutya opate yokudja kOkaukuejo fiyo okoNamutoni otai ka pata manga pakafimbo.
Opate otai ka pata okudja mulotete laFebuluali 2026. Eshi otashi ningwa opo ku longwe nokuyambula po opate oyo ya dja kOkaukuejo ya finda koKing Nehale Gate okupitila kopate yaHalali fiyo okoNamutoni.
Omanga opate tai longwa, ouministeli otau kunghilile ovatalelipo opo va longife eepate dimwe ngaashi opate okudja koGemsbokvlakte oyo ya uka kopate ipe oyo i li eekilometa 38 okuya kopate ei ya kula fiyo okoSalvadora.
Okudja koSalvadora, ovatalelipo otava shivifilwa va shinge natango va lambalala opate yakula oule weekilometa 47 fiyo va fika mOkaukuejo.
Ouministeli owa holola yo kutya ovatalelipo otava ka kwafelwa kovanambelelwa vomopate opo va ulikilwe eendjila edi tadi endwa pakafimbo. Eshi otashi ka ningwa unene momafiku opetameko eshi okulonga opate kwa hovela opo va shiive yo okukwafela vakwao ovo tava ka holoka.
Opate ei otai tengenekwa tai ka kala ya pwa okulongwa mo26 Febuluali 2026. Aveshe ovo tava ka longifa ondjila ei okutalela po moshikunino shoinamwenyo mEtosha ile eenhele odo di li mo, otava indilwa opo va longife ondjila yaSalvadora manga.
Ovatalelipo otava indilwa yo opo ve liufe keemhango nomalombwelo oo a tulwa po kouministeli womidingonoko. Otava indilwa yo opo va shikule omadidiliko omeendjila oo taa ka kala a tulwa peenhele dihapu okupukulula oshiwana.
“Ovatalelipo otava indilwa opo vaha shingilile.
Otava indilwa opo va kale ve li oupafi nokudidilika omalunduluko opakafimbo taa ka tulwa po,” ouministeli tau kunghilile ngaho.
Ouministeli otau yambula po eepate mEtosha sha dja eshi ovatalelipo vamwe va yandja omakemo avo kombinga yonghalo yeepate oyo vati ya nyaika moshikunino shoinamwenyo.
Okudja mo2024 fiyo odula ya dja ko, ouministeli owa ti owa didilika omakemo ovatalelipo kombinga youkwatya weepate mEtosha.
Omanyenyeto mahapu okwa tofa mo opate yokudja kOkaukuejo fiyo okoNamutoni, oyo i li vati monghalo ii shili.
Opate vati oya etelwa ounghundi komwaalu uhapu weehauto da humbata ondjudo ihapu, odo da eta omamanya a we ko kopate, nomalambo mahapu mopate.
Mo 2024, ouministeli owa li wa kufa etokolo lomeendelelo, eshi va tuma omambakumbaku atatu a longe opate okudja koHalali fiyo oNamutoni, Okaukuejo fiyo Halali, oshoyo Namutoni fiyo okomuvelo waKing Nehale.
Okudja mo2018, ouminsteli owa lundulula opate yokudja kOkaukuejo fiyo okomuvelo waGalton, ya longa eekilometa 200 fiyo omuMarsa neudo.
“Ohatu yandje ombili kovatalelipo kepiyaano lopakafimbo nohatu kwashipaleke kutya onghalo yeepate mEtosha oya tulwa moilonga kouministeli womidingonoko,” tava holola ngaho.
-awakudumo@nepc.com.na