Ovanafikola kofikola Onambutu Combined noneudo ova nhukila mondabo okukala tava imbi nokudana oidano yopamifyuululwakalo molwaashi osha fimana okukaleka po omufyuululwakalo wOshiwambo.
Ofikola Onambutu Combined oi li moshitukulwa shaHangwena notai longo nondjungu okukala ya longa ovanafikola kombinga yefimano lomifyuululwakalo osho yo eenghulunghedi.
Omudo wa dja ko ovanafikola vokOnambutu okwa li va kufa ombinga momakondjifafano oidano yopamufyuululwakalo omo kwa li ve ya ponomola onhi-2.
Ongudu yoidano yOshiwambo otai wilikwa komuhongifikola Jansen Kamhulu ha longo pofikola opo.
Kamhulu okwa popya ta ti oku na ohokwe yokukala ta wilike nokuxwaxwameka ovanafikola va kufa ombinga moidano yopamifyuululwakalo.
“Ovanafikola ovo ve na ohokwe yokukufa ombinga mokudana nokwiimba ohava tameke okuongala konima ngeenge eetundi da pita mo. Omunafikola keshe oka manguluka okukala ka kufa ombinga,” ta ti.
Okwa ti ota lalakanene opo ofikola yavo i kale dingi, i li ponomola yotete momakondjifafano oidano yopamifyuululwakalo.
“Ohatu lalakanene okukakalela po Namibia komakondjifafano okondje yoshilongo,” ta ti.
Kamhulu okwa ti ovanafikola voumati
ovo unene va didilikwa vehe na ohokwe yokukufa ombinga moidano yopamifyuululwakalo.
“Ohatu longo yoo natango ovanafikola kombinga yonghalafano nghene ove na okukala tave li umbata pamukalo wopamufyuululwakalo. Osha fimana shaashi otashi kelele oukadona vaha ninge omateelo,” ta ti.
Natango kofikola, Onambutu oku na eumbo li li pafika womufyuululwakalo la tungwa kovanafikola omudo 2021.
Omukulunhufikola pofikola Onambutu Combined School, Maria Nendongo okwa ti eumbo eli ola fimana kovanafikola shaashi oha li longifwa kovanafikola okuninga oinyangadalwa yoshiwambo.
Okwa yelifa ta ti elalakano okuyandja ehongo kovanafikola nokukala ve na eudeko la wana kombinga yeenghulunghedi.
Okwa weda po ta ti meumbo oha mu ningwa oinyangadalwa yoshiwambo ngaashi okutwa oilya, okuhenga ondjove nosho tu imwepo ya yooloka.
Okwa ti ongudu yoidano yopamufyuululwakalo oya eta elunduluko liwa kovanafikola shaashi paife nomikalo davo oda lunduluka nawa.
“Oidano yopamifyuululwakalo oi li oshitopolwa shehongo molwashi ouministeli wetu ouna oshikondo shi na sha neenghulunghedi,” ta ti.
